हामी सबैकाे संसारन्यूज

१.
एउटाको जित, अर्काको हार हुने भयो
देखेका सपनाहरु सबै बेकार हुने भयो
मित्रता नै शत्रुतामा परिवर्तन भएपछि,
गुलाफ हैन मेरो हातमा तरबार हुने भयो ।

२.
आफ्नालाई दुष्ट, पराईलाई देवता मान्नेहरु
दुनियाँ हसाउँन बाह्र–सत्ताइस कुरा जान्नेहरु
बताइदिनुस् बोली र व्यबहार किन फरक छ
पहिला बाटो देखाई पछिबाट खुट्टा तान्नेहरु ।

३.
उकाली ओराली हजुरसँगै गर्ने मन छ प्यारा
तपाई कै घरमा बसाई सर्ने मन छ प्यारा
अथाह प्रेम गरौला नि मुना मदनले जस्तै
मर्नु परेमा सँगै साथमा मर्ने मन छ प्यारा ।

४.
दुधे बालक रुवाउदै भारी बोक्नेलाई थाहा हुन्छ
निस्तो ढिडो खुवाउदै भारी बोक्नेलाई थाहा हुन्छ
स्वर्ग कस्तो हुन्छ होला जान्ने मन छ सोध्नु साथी ,
मुन्टोले भुइँ छुवाउदै भारी बोक्नेलाई थाहा हुन्छ ।

५.
तिमी सुनौलो बिहानी म औंसीको रात भएपछि
तिमी सुन्दर पुष्पवृक्ष म झरेको पात भएपछि
धर्ती अनि आकाशको मिलन सम्भव छैन प्रिय,
मैले गर्ने चोखो माया तिमीलाई आघात भएपछि ।