हामी सबैकाे संसारन्यूज

२९ चैत, काठमाडौं । नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल प्रचण्डले केही दिनभित्रै नयाँ सरकार गठन हुने बताएका छन् ।

शुक्रबार आयोजित कर्णाली प्रदेश सम्पर्क समितिको भेला तथा प्रशिक्षण कार्यक्रममा अध्यक्ष प्रचण्डले नेपाली कांग्रेसले नयाँ सरकारका लागि पहल गरेको र जनता समाजवादी पार्टी पनि सकारात्मक भएका कारण छिट्टै नयाँ सरकार गठन हुने बताएका छन् ।

उनले शुक्रबार नेकपा माओवादी केन्द्र, नेपाली कांग्रेस र जनतासमाजवादी पार्टीवीच शुक्रबार भएको बैठक र छलफल सकारात्मक भएको बताए ।

‘पहिलोचोटी नेपाली कांग्रेस खुलेर केपीले बर्वादै पार्ने भयो, प्रतिगमनै गर्ने सत्ता कब्जा गरेर हामी सबैलाई सिध्याउने भयो भनेर नेपाली कांग्रेस आउनु ठूलो कुरा हो ।’ उनले भने ।

अध्यक्ष प्रचण्डले जसपा समक्ष नयाँ सरकार गठनका लागि नेपाली कांग्रेसले औपचारिक प्रस्ताव राखेपछि पार्टीभित्र सल्लाह गरेर टुंग्याउँछौं भन्दै जसपा पनि सकारात्मक रहेकोले केहीदिनभित्रै नयाँ सरकार बन्ने र बन्नैपर्छ भने ।

उनले नेकपा एमालेभित्रको नेपाल पक्षसँग मोर्चा बनाउन लागि परेको बताउँदै जसपासँग पनि मोर्चा बनउने सकिने बताए । ‘जसपा, एमालेको अर्को पक्षसँग मोर्चा र नेपाली कांग्रेससँग सरकारमा सँगै र चुनावी तालमेल भयो भने त्यो पनि ठूलो कुरा हुन्छ,’ उनले भने, मोहन बैद्य र मोहन विक्रमसँग पनि अहिले भर्खर एकता हुन्छ भनेर धेरै आस गर्नु हुँदैन, तर मोर्चा भने बन्छ ।’

अध्यक्ष प्रचण्डले आउने चुनावमा मोर्चा राम्रो बनाएर इमान्दार हुँदै मेहनत गर्न सकेमा चौथो नम्बरमा पुग्ने पालो केपी ओलीको बताए ।