Sansar News
२८ चैत्र, काठमाडौँ । नेकपा एमालेका तर्फबाट सरकारमा सहभागी कर्णाली प्रदेशका तीन मन्त्रीहरुले दिएको राजीनामा स्वीकृति भएको छ ।
मुख्यमन्त्री महेन्द्रबहादुर शाहीले राजीनामा दिएका प्रकाश ज्वाला, दल रावल र नन्दसिह बुढाको राजीनामा स्वीकृत गरेका हुन् ।
नेकपा एमाले संसदीय दल कर्णाली प्रदेशको आइतबारको बैठकले सरकारमा सहभागी भएका मन्त्रीलाई २४ घण्टाभित्र राजीनामा दिन निर्देशन दिएअनुसार उनीहरुले पाँच दिन अघि राजीनामा बुझाएका थिए । मुख्यमन्त्री शाहीले उनीहरुले राजीनामा दिएपछि रिक्त रहेको स्थानमा हाल कायम रहेकै मन्त्रीहरुलाई थप जिम्मेवारी दिएको छन् ।
मुख्यमन्त्रीको कार्यालयले जानकारी दिए अनुसार आर्थिक मामिला तथा योजना र उद्योग, पर्यटन, वन तथा वातावरण मन्त्रीको जिम्मेवारी आन्तरिक मामिला तथा कानुन मन्त्री नरेश भण्डारी तथा भौतिक पूर्वाधार विकास मन्त्री र सामाजिक विकास मन्त्रीको जिम्मेवारी भूमि व्यवस्था, कृषि तथा सहकारी मन्त्री विमला केसीलाई दिइएको छ ।
मुख्यमन्त्री शाही नेतृत्वको मन्त्रिमण्डलमा एमालेबाट प्रकाश ज्वालाले आर्थिक मामिला तथा योजना मन्त्रालय, दल रावलले सामाजिक विकास मन्त्रालय र नन्दसिंह बुढाले उद्योग, पर्यटन, वन तथा वातावरण मन्त्रालयको जिम्मेवारी सम्हालेका थिए ।
एमालेको चैत ४ गतेको दलको बैठकले सरकारलाई दिएको समर्थन फिर्ताको निर्णय गरेको थियो।
वि.सं.२०७७ चैत २८ शनिवार १५:०६ मा प्रकाशित
