Sansar News
२९ चैत, काठमाडौं । नेकपा एमाले माधव नेपाल समूहले ओली समूहका सुदुरपश्चिम अध्यक्ष कर्णबहादुर थापा र कञ्चनपुर जिल्ला कमिटी सदस्य राजेन्द्र सिंह रावललाई कारबाहीको घोषणा गरेको छ । चैत्र २३ र २४ गते बसेको सुदूरपश्चिम प्रदेश कमिटीको आठौं विस्तारित बैठकबाट उनीहरुलाई कारबाही गर्ने निर्णय गरिएको आइतबारको पत्रकार सम्मेलनमा जानकारी दिइयो ।
कारवाहीमा परेका थापालाई विभाजन कार्यमा संलग्न भएको र कञ्चनपुर जिल्ला कमिटी सदस्य रहेका रावलले पार्टीको विधान विपरीत आफू सुदूरपश्चिम प्रदेश कमिटीको सचिव दावी गरेकाले कारवाही गरिएको हो ।
सोहि कार्यक्रममा बोल्दै नेता रावलले प्रधानमन्त्री केपी शर्मा ओली अवैध व्यक्ति भएकाले उनले गरेको कारवाही वैध नहुने बताएका छन् । रावलले ओलीले पदको दुरुप्रयोग गरि आफ्नो गुटमा नआए पद खोस्ने धम्कि दिने गरेको पनि बताए ।
रावलका अनुसार ओलीले आफ्नो गुटमा तान्न जनप्रतिनिधिलाई धम्क्याउने गरेको र नआए पद खोस्ने भन्दै धम्कि दिनेगरेको पनि बताए । ‘प्रधानमन्त्रीले वडा, पालिका र विभिन्न पदमा निर्वाचित जनप्रतिनिधिहरूलाई आफ्नो गुटमा तान्ने प्रयास गर्दैछन्। प्रधानमन्त्रीले धम्क्याउने र तर्साउने क्रियाकलाप गर्नु निन्दनीय छ,’ उनले भने।
वि.सं.२०७७ चैत २९ आइतवार १७:०४ मा प्रकाशित
