हामी सबैकाे संसारन्यूज

किशोर कोइराला,सुनसरी

लाग्छ सारा चोट दिलका चाहनामा छन् खुसी
बल्झिएका घाउ उनकै सम्झनामा छन् खुसी

उर्लिए गङ्गा र जमुना आँसुको भल निथ्रियो,
जिन्दगीका पाइला खुद सान्त्वनामा छन् खुसी

दुःखका खाडल छिचोल्दै बाँच्न गाह्रो भो यहाँ
हातका रेखा समयको कल्पनामा छन् खुसी

हर बिहानी घाम छर्दै सूर्यले दिन पस्किँदा,
जूनतारा सङ्क्रमणको बेदनामा छन् खुसी

चारपलको जिन्दगीमा मृत्यु शाश्वत सत्य हो
बुझ्दछन् जो ती सदाझैँ साधनामा छन् खुसी

बहर : रमल मुसम्मन महजुफ
अर्कान : फाइलातुन् फाइलातुन् फाइलातुन् फाइलुन्
वजन : २१२२ – २१२२ – २१२२ – २१२
काफिया : अना
तहलिली रदिफ : मा
रदिफ : छन् खुसी