हामी सबैकाे संसारन्यूज

सन्सारन्युज । शहिद मित्रमणी आचार्यको जन्म बि.सं. २०१९ असार ३ गते प्युठान जिल्लाको रम्दीमा भएको थियो । आमा पिताम्बरा आचार्य र बाबु रेशमराज आचार्यको चौथो सन्तानको रुपमा मित्रमणीको जन्म भएको थियो । उनका ३ दाजु, १ भाई र २ बहिनी रहेका छन् ।

आचार्यले प्राथमिक स्तर सम्मको शिक्षा बागेश्वरी प्रा.वि. र माध्यमिक विद्यालय स्तरको शिक्षा मुक्ति मा.वि. रातमाटाबाट उत्तिर्ण गरेका थिए । कृषि क्याम्पस पक्लिहवा रुपन्देहीबाट कृषि विज्ञानमा आइएस्सी पास गरी २०४१ सालमा आचार्यले कृषि क्याम्पस रामपुर चितवनबाट बिएस्सी पास गरेका थिए ।

विद्यार्थी जिवनकाल देखि नै राजनैतिक आन्दोलन सँग नजिक रहेका आचार्य तत्कालिन अ.ने.रा.स्व.वि.यु. को मुक्ति मा.वि. प्रारम्भ्कि कमिटिका अध्यक्ष भएका थिए भने ०३७ सालमा कृषि क्याम्पस पक्लिहवाको स्ववियु सभापतिमा निर्वाचित भएका थिए । रामपुर कृषि क्याम्पस अध्ययनको क्रममा आचार्य ०४१ सालमा त्यसै क्याम्पसको स्ववियु सभापति भएका थिए । आचार्य विद्यार्थी संगठनमा अ.ने.रा.स्व.वि.यु.आठौंको केन्द्रिय प्रतिनिधि हुँदै केन्द्रिय सदस्य र मध्य तराई उपकेन्द्रको इन्चार्जका रुपमा कार्यरत समेत रहेका थिए ।

२०४२ साल बैशाख १८ गते मेघौलीमा आयोजना गरिएको किसान सभामा जाने क्रममा दिउँसो २ ः३० बजे पर्साढापमा घांटी भाँचेर फालिएको अवस्थामा फेला परेका थिए । आचार्यको उपचारको क्रममा सोहि दिन अस्पतालमा शहादत भएको थियो । अनेरास्ववियू (क्रान्तिकारी)ले आफ्ना दस्ताबेजमा आचार्यलाई नेबिसंघ र तत्कालिन पञ्चायती समुहले हत्या गरेको आरोप लगाउने गरेको छ ।