हामी सबैकाे संसारन्यूज

१२ जेठ, दिल्ली । नेपाली जनसम्पर्क समिति भारत र गैरआवासीय नेपाली संघ भारतको पहलमा नेपाल फर्कने क्रममा जंगलमा अलपत्र परेका नेपालीको उद्धार गरी नेपाल पठाइएको छ ।

भारतको महाराष्ट्रबाट नेपाल जाने क्रममा दलालहरुले ७५ जना नेपालीहरुलाई गौरी फन्टासम्म पुर्याइदिने भनेर प्रतिव्यक्ति ४ हजार भाडा लिई महाराष्ट्र र मध्यप्रदेशको बोर्डर नजिक जङ्गलमा अलपत्र पारेका थिए ।

जनसम्पर्क समिति भारतका अध्यक्ष बालकृष्ण पाण्डेको नेतृत्वमा नेपाली दूतावास नयाँदिल्ली, मध्यप्रदेशको गृहमन्त्रालय, नेपाली जनसम्पर्क समिती मध्यभारतका अध्यक्ष लोक मनि घिमिरे ऋषिकेश घिमिरे, कमल श्रेष्ठ, सीता अधिकारी, नन्दनी न्यौपाने ,पुजा पाण्डे लागायतको टिमले गैरआवासीय नेपाली संघ भारतको विशेष सहयोगमा नेपालको गौरी फण्टा बोर्डरसम्म पिसिआर परीक्षण तथा आवस्यक मापदण्ड पालना गरी नेपाल पठाउन सफल भएको बताइएको छ ।

‘स–साना बच्चा बिमारी, जेष्ठ नागरिकले धेरै दुःख पाउनु भएको थियो सबैको सहयोग तथा ३ दिनको प्रयासमा उद्धार गरेर पठाउन सफल भयौं ।’ अध्यक्ष पाण्डेले संसारन्युजसँग भने ।

उनीहरुलाई जंगलमा अलपत्र पारेर भाग्ने दलालहरुलाई खोजी गरी कानुनी कारवाहीको प्रक्रिया अगाडि बढाइएको अध्यक्ष पाण्डेले जानकारी दिए ।

त्यस्तै अन्य १३० जनालाई पनि यसरी नै बिचमा ५ दिनदेखि अलपत्र परेको जानकारी आएको बताउँदै पाण्डेले सहयोगका लागि जुटेको तर कारवाही हुन्छ भनेर दलालहरुले उनीहरु रहेको ठेगाना नदिएकोले गाह्रो परिरहेको बताए । उनले महामारीका बेला सबैकुरा नबुझी यात्रा नगर्न तथा दलालको चंगुलबाट बच्न समेत पाण्डेले अनुरोध गरेका छन् ।