हामी सबैकाे संसारन्यूज

जेठ २१, काठमाडौं । नेकपा (एमाले)का अध्यक्ष केपी शर्मा ओलीले सुदुरपश्चिम प्रदेश संसदीय दलका नेता प्रकाशबहादुर शाहलाई ४८ घण्टे स्पष्टीकरण सोधेका छन् । केन्द्रीय सदस्यसमेत रहेका उनलाई पार्टी अध्यक्षको तर्फबाट ओलीले स्पष्टीकरण सोधेका हुन् ।

शाहलाई यसअघि प्रदेश कमिटीले पनि स्पष्टीकरण सोधेको थियो ।

पार्टी स्थायी कमिटीको निर्णय विपरीत प्रदेश सरकारलाई किन समर्थन कायमै राखेको भनेर स्पष्टीकरण सोधिएको हो । गत जेठ १० मा बसेको एमाले स्थायी कमिटी बैठकले सुदुरपश्चिम सरकारलाई दिएको समर्थन फिर्ता गर्ने निर्णय गरेको थियो । तर, प्रदेश संसदीय दलले उक्त निर्णयलाई मान्न अस्वीकार गरेको थियो ।

एमालेले फिर्ता हुन गरेको निर्देशनलगत्तै माधवकुमार नेपाल पक्षको बहुमत भएको प्रदेशमा तीन मन्त्रीले राजीनामा दिएर थप पाँच मन्त्री र चार राज्यमन्त्री बनेका थिए । संसदीय दलका नेता शाह पुनः मन्त्रीमा दोहोरिएका थिए ।

२५ प्रदेश सभा सदस्य भएको सदुरपश्चिममा माधव पक्षका मात्रै १८ सांसद छन् । जहाँ बहुमत सदस्य भएको कारण ओलीलाई कारबाही गर्न असहज भएको छ ।