हामी सबैकाे संसारन्यूज

१४ साउन, काठमाडौँ । विवेकशील साझा पार्टीका संयोजक मिलन पाण्डेले कमल थापा, महेश बस्नेत र गोकुल बास्कोटाहरुलाई खुशी नहुन आग्रह गरेका छन् ।

सो पार्टीकै अर्का संयोजक रविन्द्र मिश्रले संघीयता खारेज र धर्म निरपेक्षताबारे जनमत संग्रह गर्नुपर्ने प्रस्ताव सार्वजनिक गरेपछि उत्साहित भएर आएका उनीहरुका अभिव्यक्तिलाई लिएर पाण्डेले सामाजिक सञ्जालमार्फत यस्तो आग्रह गरेका हुन् ।

‘ढुक्क हुनुहोस्, पार्टीले अनि देशले प्रतिगमन स्विकार्ने छैन, फेरी देशलाई द्वन्द्वमा धकेल्ने नीति लिने छैन, समाजलाई विभाजित गर्ने छैन, देशलाई फेरी व्यवस्था परिवर्तनको नाउँमा २०-२५ वर्ष पछाडि धकेल्ने छैन’ मिश्रको प्रस्ताव पार्टीको लाइन नभएको स्पष्ट पार्दै उनले भनेका छन् ‘त्यसैले, कमल थापाजीहरू, महेश बस्नेतजीहरू र गोकुल बास्कोटाजीहरू खुसी हुन जरुरी छैन।’

संयोजक पाण्डेले पार्टीको आधिकारीक धारणा स्पष्ट पार्न महाधिवेशनको घोषणा गर्ने बताएका छन् । आफूलाई साथीहरुबाट अब पार्टी कसरी अगाडी बढ्छ भनेर सोध्ने गरेको बताउँदै उनले १–२ दिनमा केन्द्रीय कमिटी बसी महाधिवेशनको घोषणा गर्ने जानकारी गराएका हुन् ।
उनले महाधिवेशनले पार्टीको स्थापना कालदेखिको मर्म र आशालाई समेटेर पार्टीलाई कसरी सफल बनाउने र प्रोग्रेसिभ बनाउने स्पष्ट नीति र कार्यक्रमहरू सहितको दस्ताबेज ल्याउने बताएका छन् ।

यसअघि  मिश्रको प्रस्ताव सार्वजनिक भए लगत्तै संयोजक पाण्डेले मिश्रको प्रस्ताव पार्टीको धारणा नभएको स्पष्ट पारेका थिए । विवेकशिल साझा पार्टीको घोषणापत्र, प्रस्तावित विधान अनुसार विवेकशील साझा पार्टी सामाजिक न्याय, समावेशीता र गणतन्त्रको जगमा बनिरहेको प्रोग्रेसिभ पार्टी भएको बताउँदै विगतमा भएका आन्दोलनका उपलब्धिहरूको रक्षा गर्ने र संविधानको पूर्णतः पालना गर्ने प्रतिवद्धतामा पार्टी दृढ रहेको उल्लेख गरेका थिए ।