Sansar News
साउन १९, काठमाडौं । नेकपा (एमाले)को माधवकुमार नेपाल पक्षीय सांसद रामकुमारी झाँक्रीले केपी शर्मा ओलीले नेतृत्वको सरकारले गरेका धेरै निर्णय खारेज गर्नुपर्ने बताएकी छिन् । मंगलबार प्रतिनिधि सभा बैठकलाई सम्बोधन गर्दै उनले ओलीले धेरै नै जनविरोधी निर्णय गरेको बताइन् ।
उनले संविधानलाई ट्रयाकमा हिँडाउन पनि ओलीका निर्णयहरु खारेज गर्नुपर्ने तर्क गरिन् ।
प्रतिनिधि सभा बैठकमा उनले भनिन् , ‘सरकारले संविधानलाई ट्रयाकमा राख्न र सही बाटोमा हिँडाउने मात्रै दायित्व बोकेको छैन, पूर्ववर्ती सरकारले गरेका जनविरोधी कार्यहरुलाई खारेजी गर्ने जिम्मेवारी पनि बोक्नुपर्छ ।’
उनले तत्कालिन सरकारले जग्गा हदबन्दीको विषयमा गरेको निर्णय सच्याउनुपर्ने बताईन् । सो निर्णयसँगै गरिएका नीतिगत भ्रष्टाचारको खोजी हुनुपर्ने उनको भनाई छ ।
वि.सं.२०७८ साउन १९ मंगलवार १४:०१ मा प्रकाशित
