हामी सबैकाे संसारन्यूज

 ३ अगस्त, युके । गुल्मी जिल्ला समाज युकेले कोरोनाविरुद्ध लड्नका लागि ३ लाख रुपैयाँ बढीको स्वास्थ्य सामाग्री पठाएको छ ।

यसअघि पनि विभिन्न चरण गरेर १ करोड बढीको स्वास्थ्य सामग्री जिल्ला पठाइसकेको समाजले हालैमात्र ३ लाख २१ हजारको सर्जिकल समास्क तथा पिपीई सहयोग पठाएको हो ।

समाजले प्रत्येक नगरपालिकालाई २६ हजार ४ सय थान र गाउँपालिकाहरुलाई २२ हजारका दरले मास्क वितरण गरिएको समाजका संस्थापक अध्यक्ष ओम काउचा थापाले जानकारी दिएका छन् ।

थापाका अनुसार जिल्ला अस्पताल गुल्मीलाई १७ हजार ६ सय, प्राथमिक स्वास्थ्य चौकीहरू, रिडी, श्रृङ्गा, जोहाङ र धुर्कोटमा ४ हजारको दरले मास्क र पीपीई एकमुष्ठ रुपमा पठाइएको हो ।

त्यसैगरी पत्रकार महासंघ गुल्मीलाई ४ हजार २ थान, रेसुड्गा बहुमुखी क्याम्पसलाई २२००, जिल्ला प्रशासन कार्यालय र सुरक्षाकर्मीहरूका लागि २८,६०० वितरण गरिएको हो ।

उक्त सामग्रीहरु प्रमुख जिल्ला अधिकारी रुद्रादेवी शर्माको उपस्थितिमा सम्बन्धीत व्यक्तिहरुलाई हस्तान्तरण गरिएको हो ।

समाजका महासचिव वीर वलालको संयोजन, सल्लाहकार कोशलेश्वर ढकालको सहसंयोजन र सहकोषाध्यक्ष तारा भट्टराई र सदस्य राधा खरेलले उक्त अभियानमा सहयोग पुर्याएका थिए । साथै अभियानका सल्लाहकार फत्त थापाले आफू आवद्ध ‘होम इन्सटेड’ कम्पनीका तर्फबाट झण्डै ६५ हजार पाउन्ड पर्ने तीनलाख २१ हजार मास्क उपलब्ध गराएको बताइएको छ ।

समाजका अध्यक्ष टोप पल्लीका अनुसार सम्पूर्ण ढुवानी एयर कार्गो खर्च झण्डै ११ हजार पाउण्ड गुल्मी जिल्ला समाज युकेका सदस्यहरुबाट संकलन गरिएको जानकारी दिएका छन् ।