हामी सबैकाे संसारन्यूज

साउन २१, काठमाडौं । नेकपा (एमाले) नामबाट माधवकुमार नेपाल पक्षले केन्द्रीय समितिको बैठक आयोजना गरेकोप्रति पार्टी केपी शर्मा ओली पक्षले आपत्ति जनाएको छ । बुधबार एक प्रेस वक्तव्य जारी गर्दै ओली पक्षले पार्टी केन्द्रीय कार्यालयले कुनै बैठक आयोजना नगरेको भन्दै बोलाइएको बैठक अनाधिकृत भएको बताएको छ ।

एमालेको नामबाट बेग्लै गतिविधि नगर्न पनि माधव पक्षलाई चेतावनी दिएको छ । ओली पक्षले माधव पक्षले आयोजना गरेको बैठक अनधिकृत भएको बताउँदै उक्त बैठकमा सहभागि नहुन पनि नेताहरुलाई अपिल गरेको छ ।

‘श्रावण २१ गते एमाले केन्द्रीय कमिटीको कुनै बैठक आयोजना नगरिएको सबैमा जानकारी गराउँदछु, पटक–पटक एमालेको नामबाट अनाधिकृत गतिविधि गर्ने र सो गतिविधिमा सरिक हुने विषय संविधान, प्रचलित कानुन र पार्टी विधान विपरित हुने भएकाले सो गतिविधिमा नलाग्न पार्टी कार्यकर्ताहरुलाई अपिल गर्दछु’, एमाले केन्द्रीय कार्यालय सचिव शेरबहादुर तामाङद्धारा जारी विज्ञप्तीमा भनिएको छ ।

माधव पक्षले बिहीबार आफुँ पक्षको केन्द्रीय कमिटीको बैठक बोलाएको छ । पार्टी एकता वा गठबन्धनसँग सहकार्य गर्ने भन्ने विषयमा अलमल देखिएको माधव पक्षले ठोस निर्णय लिन बैठक बोलाएको हो ।

ओली पक्षले भने माधव पक्षले बोलाएको बैठक पार्टी विभाजन गराउने उद्देश्यले बोलाएको आरोप लगाएको छ ।