हामी सबैकाे संसारन्यूज

१.
मन भित्रको कालो भाव सुधारेर हेर्नु
अझ सके दिलको दैलो उघारेर हेर्नु
औँला ठड्याई अरुलाई दोष दिनु अघि,
आफैँलाई नै एकपटक निखारेर गर्नु ।
२.
झिम झिम त्यो परेली नपार्दिनु है
रहरहरु सामुन्ने ल्याई नझार्दिनु है
दुईटा मुटु पहिल्यै देखि म सँगै छन्
अर्को मुटु यता पट्टी नसार्दिनु है ।
३.
जंगल छैन काफल खाने दिन गएछन्
मकै भटमास भुटेर लाने दिन गएछन्
गाइबस्तु कहाँ पाउनु आजकल चराउन
चौतारी भन्दै शित्तल खाने दिन गएछन् ।
४.
नियतिले छल गरेर नलुटोस कहिल्यै पनि
समाएका यि हातहरु नछुटोस कहिल्यै पनि
यो जन्म मात्रै कहाँ हर जन्म सँगै हिड्ने मन छ
यति गहिरो प्रेम हाम्रो नटुटोस कहिल्यै पनि ।
५.
कोमल शुन्दर मुहारझैँ मुस्कान मन्द मन्द होस् ।
गुण पनि त्यसमा थपियोस् सारा बुलन्द होस् ।
यति भए देवलोकका अप्सरा,उर्वसी किन चुन्नु ?
नदेखेको स्वर्ग भन्दा यहि लोकमा आनन्द होस् ।