हामी सबैकाे संसारन्यूज

आस्था भए त्यो मनमा सबैको
विश्वास ढल्दैन यहाँ कसैको
यो धर्म भन्ने जनमा हरायो
जो सर्वहारा अनि त्यो डरायो ।१।

हाम्रा विधाता जगमा छरेर
जोगाइ ल्याऊ समता भरेर ।
संस्कार बाँचे तब देश बाँच्छ
भाषा र भाषी जब श्वास फेर्छ ।२।

नेपाल हाम्रो सुखको छहारी
यो देश भित्रै चिउला उमारी ।
फालेर आऊ मनका वितृष्णा
जाग्दै समाऊ हितकार कृष्णा ।३।

धेरै छ आहा जलधार राम्रा
देखाइ आऊ उपहार हाम्रा ।
हेरेर आऊ न सुरम्य खानी
त्यसै गए खेर अमूल्य पानी ।४।

जागौँ जगाऔँ सबएक हामी
फुल्नेछ ताजा जब देश नामी ।
भूस्वर्ग यो देश कहाँ छ अन्त
खोजेर भेटिन्न अथाह ग्रन्थ ।५।

ए मित्र तिम्रो मनको जवानी
खोज्दै जुटाऊ हितकार छानी ।
पाखा र भित्ता हरिया बनाइ
खोजेर आऊ छहरा समाइ ।६।

यो देश हाम्रो भवमा चिनाऊ
जो भेष राम्रो जनमा लगाऊ ।
उठ्नेछ नेपाल सुगन्ध छर्दै
झुल्नेछ बाला लटरम्म फुल्दै ।७।

छन्द: इन्द्रवज्रा