हामी सबैकाे संसारन्यूज

७ अगस्त, लण्डन । गैरआवासीय नेपाली संघ राष्ट्रिय समन्वय परिषद् (एनआरएनए) यूकेको अध्यक्षमा प्रेम गाहामगरको पूरै प्यानल विजयी भएको छ ।

अनलाइन मतदानबाट भएको निर्वाचनमा गाहा मगरले अध्यक्षका अन्य दुई प्रत्यासी दीपक श्रेष्ठ र रोजिना प्रधान राईलाई पछि पार्दै जित हासिल गरेका हुन् ।

निर्वाचन समितिले शुक्रबार राती पत्रकार सम्मेलनमार्फत् जारी गरेको नतिजा अनुसार गाहामगरले ४,५७४ मत ल्याएर अध्यक्षमा विजयी भएका हुन् भने श्रेष्ठले २,१९१ र प्रधानले २,१४८ मत प्राप्त गरेका थिए ।

निर्वाचन समितिका अनुसार अध्यक्षसहित कार्यसमितिका सबै पदाधिकारीमा गाहामगरकै समूह विजयी भएको हो ।

त्यसैगरी उपाध्यक्षद्धयमा ४,१६९ मतसहित सुनिलबाबु खड्का ३,६६५ मतसहित गोविन्द खरेल विजयी भएका छन् । उनीहरुका प्रतिद्धन्द्धी पवन शर्माले २,३६४ र तेजेन्द्र रोकाले १,४३५ तथा अमन गौचनले ९२५ मत ल्याएका थिए ।  महिला उपाध्यक्षमा ३७४३ मतसहित शकुन्तला गुरुङ विजयी भएकी छन् । उनकी प्रतिद्धन्द्धी सरस्वती केसी २१५२ र प्रसुना कंडेलले २,४६९ मत प्राप्त गरेका थिए ।

त्यसैगरी नर्दन आयरल्यान्डबाट प्रतिनिधित्व गर्ने उपाध्यक्षमा नारायण कंडेलले ४,४९५ मत ल्याएर विजयी भएका छन् । उनका प्रतिद्धन्द्धी नारायण कुँवरले २,७४८ मत ल्याएका थिए ।

त्यस्तै उपाध्यक्षमा स्कटल्यान्डबाट मोहन कार्कीले ४,५९५ मत ल्याएर जित हासिल गरेका छन् भने उनका प्रतिद्धन्द्धी छबिलाल अर्यालले २९९ मत ल्याएका थिए ।

त्यसैगरी समितिको महासचिवमा खुशी लिम्बूले ३,७४७ मतसहित विजयी भएका छन् भने महासचिवका अर्का प्रत्यासी जीत रानाभाटले २,६३९ र डा मुकुन्द बांस्तोलाले २३२५ मत प्राप्त गरेका थिए । साथै सचिवहरुमा विष्णु चालिसे, ज्ञानेन्द्र आले, महिला सचिवमा नम्रता घले, कोषाध्यक्षमा विष्णु खरेल, सहकोषाध्यक्षमा सशांक शर्मा, युवा संयोजकमा तीर्थबहादुर (अनिल) मल्ल र महिला संयोजकमा विमला लिम्बू निर्वाचित भएका छन् ।

त्यसैगरी कार्यसमितिको सदस्यमा उपेन्द्र पौडेल, सुरेश परियार, सुमन शर्मा, पदमबहादुर शाही, इन्दिरा खनिया, हिरा (दीपक) सापकोटा, चेतबहादुर राना, चम्पा थापा, विशाल राई, भानुभक्त घिमिरे, भिम खनाल र बालकृष्ण दाहाल विजयी भएका छन् ।

इंग्ल्याण्ड राज्यमा एलबीजेड
त्यस्तै एनआरएनए इंग्ल्यान्ड राज्य परिषद्मा ३,६२३ मतसहित एलबीजेड गुरुङ विजयी भएका छन् । उनका प्रतिद्धन्द्धीडा डा.मीन रानाभाटले ३,१४१ मत प्राप्त गरेका थिए । साथै परिषद्को उपाध्यक्षमा भक्त दर्जी, सचिवमा रामप्रसाद पन्थी र कोषाध्यक्षमा सचिन भट्टराई विजयी भए ।

स्कटल्याण्डमा काशिराम भण्डारी
स्कटल्यान्ड परिषद्मा ५२२ मतसहित काशिराम भण्डारी अध्यक्षमा विजयी भएका छन् भने उनका प्रतिद्धन्द्धी दिवाकर पाण्डेले २५० मत ल्याएर पछि परेका थिए । साथै परिषदको उपाध्यक्षमा उज्वल कार्की, सचिवमा मनिष खत्री, सहसचिवमा यशोदा सुमी भन्डारी र कोषाध्यक्षमा शर्मिला भन्डारी, सहकोषाध्यक्षमा प्रजापति शर्मा र सदस्यहरुमा बलिभद्र अमै, कमला श्रेष्ठ, कृष्ण देवकोटा र टिकाराम खराल विजयी भएका छन् । वेल्स र नर्दन आयरल्यान्डमा यसअघि नै निर्विरोध भएको थियो ।

यसअघि एनआरएनए युकेको दुई कार्यकाल उपाध्यक्ष रहेर काम गरेका नवनिर्वाचित अध्यक्ष गाहा मगरले संघमा आर्थिक पारदर्शीता र गोर्खा मुद्दालाई प्राथमिकता दिएर निर्वाचनमा होमिएका थिए । नेपालमा पूर्व राष्ट्रिय बक्सिङ खेलाडी समेत रहेका गाहामगर सन् १९९६ मा ब्रिटिश गोर्खामा प्रवेश गरेका थिए । साथै सन् १९९७ मा उनले ब्रिटिश सेनाको तर्फबाट विभिन्न मुलुकमा भएका बक्सिङ प्रतियोगितामा भाग समेत लिएका थिए ।