हामी सबैकाे संसारन्यूज

साउन २४, काठमाडौं । नेकपा (एमाले)का उपाध्यक्ष एवं राष्ट्रिय सभा सदस्य वामदेव गौतमले भूमिसम्बन्धी समस्या समाधान गर्न सबै निजी जमिन सरकारी स्वामित्वमा ल्याउनुपर्ने प्रस्ताव गरेका छन् । आइतबार राष्ट्रिय सभाको बैठकमा बोल्दै उनले भूमिहीन र सुकुम्बासीको समस्या समाधान गर्न जमिनमाथिको व्यक्तिगत स्वामित्व अन्त्य गर्नुपर्ने बताए ।

‘जमिनमाथि व्यक्तिगत स्वामित्व जहिलेसम्म हुन्छ, त्यसबेलासम्म एकथरि मानिस त्यसलाई उपयोग गरेर धनि हुने, अर्काथरि मानिसहरु सुकुम्बासी हुँदैहुँदै जाने,’ गौतमले भने ।

लामो समयदेखि बसेका भूमिहीनहरु र सुकुम्वासीको समस्या समाधान गर्न पहिला भूमिसुधार लागू गर्नुपर्ने उनले बताए। ‘भूमिहीन सुकुम्वासीलाई जमिनमात्र दिएर समाधान हुन्न,’ गौतमले भने, ‘जबसम्म जमिन दिइन्छ भूमिहीन र सुकुम्वासी बनाउने प्रक्रिया त्यहीँबाट सुरु हुन्छ।’

राष्ट्रिय सभामा विशेष समय लिएर बोल्दै उनले व्यक्तिगत जमिनलाई चलनचल्तीको भाउमा सरकारले खरिद गर्नुपर्ने र भूमि उपयोगको नीति बनाउनुपर्ने बताए ।

‘हामीले पहिले नै गल्ती गर्‍यौं र त्यो व्यक्तिगत स्वामित्वमा गयो। अब फेरि सबै सरकारको स्वामित्वमा ल्याउने काम गरौं। अब जमिन बाँड्ने गलत बाटोमा जानुहुँदैन,’ गौतमले भने, ‘पहिला जमिनदारी थियो, तर अहिले छैन। रगत पसिना बगाएर बनाएकाले चलन चल्तीको भाउमा सरकारले खरिद गरेर लिजमा दिनुपर्छ।’

उनले भूमि आयोग विघटन गर्ने र अर्को आयोग गठन गर्ने काम नगर्न सुझाव दिएका छन् ।