Sansar News
साउन २७, काठमाडौं । लुम्बिनी प्रदेशसभाको विशेष अधिवेशन आह्वानविरुद्ध दायर गरेको रिट निवेदनमाथि सर्वोच्च अदालतका न्यायाधीश डा। आनन्दमोहन भट्टराईको इजलासमा सुनुवाइ हुने भएको छ । सर्वोच्चको वेवसाइटमा जनाइएअनुसार उक्त रिट पेशी सूचीको ८ औँ नम्बरमा परेको छ।
लुम्बिनी प्रदेशका पूर्वमन्त्री तथा प्रदेशसभा सदस्य लिला गिरीले दायर गरेको रिट निवेदन बुधबार न्यायाधीश भट्टराईको एकल इजलासमा पेसी तोकिएको छ ।
यता लुम्बिनी प्रदेशसभाको विशेष अधिवेशन भने आज सुरु हुँदैछ । दिउँसो १ बजे बस्ने प्रदेशसभा बैठकमा मुख्यमन्त्री शंकर पोखरेलविरुद्ध दायर भएको अविश्वास प्रस्तावमाथि छलफल हुनेछ ।
बैठकमा एमाले भने सहभागी नहुने तयारीमा छ । बुधबार बिहान बसेको एमालेको संसदीय दलको बैठक पछि दलका सचेतक भूमिश्वर ढकालले बैठक कानूनविपरीत बोलाइएको भन्दै सहभागी हुन नसक्ने बताएका थिए ।
वि.सं.२०७८ साउन २७ बुधवार ११:५५ मा प्रकाशित
