Sansar News
साउन २७, काठमाडौं । लुम्बिनी प्रदेशसभामा मुख्यमन्त्री शंकर पोखरेलविरुद्व दर्ता अविश्वासको प्रस्तावमाथि छलफल अगाडि बढेको छ । पोखरेलले प्रदेश प्रमुख अमिक शेरचनसमक्ष राजीनामा दिएपनि सूचना नआएको भन्दै प्रदेशसभाले प्रक्रियालाई अगाडि बढाएको हो ।
प्रदेशसभा बैठकको सुरुवात गर्दै सभामुख पूर्णंबहादुर घर्तीले राजीनामा दिएको विषय आधिकारिक रुपमा प्रदेशसभालाई जानकारी नआएको भन्दै प्रक्रियालाई अगाडि बढ्ने जानकारी दिएका थिए । घर्तीले जानकारी दिएसँगै विपक्षी गठबन्धनको तर्फबाट कांग्रेस संसदीय दलका नेता वीरेन्द्रकुमार कनौडियाले प्रदेश सभा बैठकमा पोखरेलविरुद्वको अविश्वास प्रस्ताव पेश गरेका छन् ।
प्रदेशसभामा सत्ता पक्ष नेकपा (एमाले)का सांसद भने अनुपस्थित छन् ।
पोखरेल अल्पमतमा रहेको भन्दै विपक्षी गठबन्धनले गत साउन १९ मा अविश्वासको प्रस्ताव दर्ता गराएका थिए । साथै उनीहरुले प्रदेश प्रमुख समक्ष विशेष अधिवेशनको माग गर्दै ३४ सांसदहरुको हस्ताक्षर बुझाएका थिए । उनीहरुको निवेदनअनुसार प्रदेश प्रमुखले आजदेखि अधिवेशन सुरु भएको हो ।
सम्बन्धित समाचार
अविश्वासको प्रस्ताव ‘फेस’ गर्ने अवस्था नदेखेपछि शंकर पोखरेलले दिए राजीनामा
वि.सं.२०७८ साउन २७ बुधवार १४:०२ मा प्रकाशित
