Sansar News
१ भदौ, बनेपा । ओझेलमा परेको तिलेश्वर महादेव मन्दिरमा पछिल्लो समय दर्शनार्थीको घुइँचो लाग्न थालेको छ ।
काभ्रेपलाञ्चोकको बेथानचोक गाउँपालिका–४ हात्तीडोलमा रहेको सो मन्दिरमा पछिल्लो समय दर्शनार्थीको घुइँचो बढ्न थालेको हो ।
पनौती नगरपालिका–९ सुनथानका चित्रबहादुर हुमागाईं पहिलो पटक तिलेश्वर महादेव मन्दिरमा पुगे । उनी तिलेश्वरको दर्शन गरेमा मनोकांक्षा पूरा हुने विश्वासले हिँडेरै मन्दिर गएका हुन् । उनले भने, “ झक्तजन टाढा टाढाबाट आउने भएकाले सहज पहुँचका काममा स्थानीय सरकारले ध्यान दिनुपर्छ ।”
करिब एक वर्ष अगाडि चन्दा सङ्कलन गरी मन्दिर र सत्तल निर्माण गरिएको थियो । मोटरबाटोलाई व्यवस्थित तथा सिँढी निर्माण गर्न आवश्यक रहेको भक्तजन बताउँछन् । मन्दिरका पुजारी टलकबहादुर महतका अनुसार मन्दिरका बारेमा जानकारी भएको र प्रचारप्रसार हुन थालेको करिब आठ वर्ष मात्रै भएको छ ।
बेथानचोक ४ का वडाध्यक्ष लालबहादुर श्रेष्ठले धार्मिक तथा ऐतिहासिक महत्व बोकेको तिलेश्वर मन्दिरको संरक्षण र प्रचारप्रसार गर्न प्राथमिता दिएको बताए ।
सुरुमा मन्दिरसम्म जानका लागि बाटो नै नभएको र पछि वडाको पहलमा मोटरबाटो निर्माण गरेपछि अहिले आवतजावतमा सजिलो भएको उनले बताए ।
वि.सं.२०७८ भदौ १ मंगलवार १३:४८ मा प्रकाशित
