४ भदौ, काठमाडौं । काठमाडौं महानगरपालिकाले रत्नपार्क वरपर राखेका वायु प्रदुषण मापन यन्त्र आफैँ प्रदूषित बनेको छ । यन्त्रको पछाडिको भागमा राखिएको फोहोरले वायु प्रदुषण मापन यन्त्र आफैँ प्रदूषित बनेको हो ।

वायु प्रदुषण मापन गर्ने यन्त्रको पछाडीको भागमा राखिएको फोहोर भरिएर पोखिनै लागेको छ । तर फोहोरलाई त्यहाँबाट निकालिएको छैन । ती फोहोरको भाँडोलाई तत्काल खालि नबनाउने हो भने वायु प्रदुषण मापन यन्त्र नै फोहोरको डंगुरभित्र नहराउला भन्न सकिन्न ।

सधैँजसो सवारी साधन र यात्रीहरुको भिडभाड रहने देशको राजधानी जस्तो ठाउँमा वायु प्रदुषण मापन गर्ने यन्त्र नै प्रदूषित भए पछि जनताको स्वास्थ्यमा कस्तो असर पर्ला ? रत्नपार्कमा रहेको वायु प्रदुषण मापन यन्त्र वायु प्रदुषण मापनका लागि नभई फोहोर फाल्नका लागि राखिएको जस्तो देखिन्छ ।

राजधानीको रत्नपार्कलगायतका ठाउँहरुका वरपर राखिएका वायु प्रदुषण मापक यन्त्रहरुमध्ये धेरै जसो यन्त्रले प्रदुषण मापनको साटो फोहोर हाल्ने भाँडोको मात्र काम गरिरहेको छ । केहि यन्त्र बाहेक धेरै जसो यन्त्रले मापनको काम गरिरहेका छैनन् ।

अहिले देशको संघीय राजधानी काठमाडौं फोहोरको डंगुरले कुरुप देखिएको छ । यस्तो बेलामा महानगरले प्रदुषणको मात्रा थाहा पाउन स्थापना गरेका प्रदुषण मापक यन्त्रहरुको हालत देख्दा लाग्छ, स्थानीय सरकारहरु प्रविधिमैत्री होइनन् विरोधी हुन् ।

किन उठेन काठमाडौंको फोहोर ?