Sansar News
भदौ ८, काठमाडौं । माधवकुमार नेपाललाई पार्टी विभाजन गर्न उस्काएर अन्तिम समय साथ छाडेका भीम रावल अन्ततः आफ्नै पकड क्षेत्रबाट एक्लिने भएका छन् । सुदुरपश्चिममा राम्रो पकड भएका रावललाई उनकै अति निकटस्थ नेताहरुले साथ छाडेका हुन् ।
रावलका अति निकटस्थ मानिने दीर्घ सोडारी र तारा लामा तामाङलगायतको समूह माधव पक्षमा लागेका छन् । रावल निकट देखिएका र सुदुरपश्चिममा राम्रो प्रभाव भएका एमालेका नेताहरु प्रेम आले, विना बुढाथोकी, निरा जैरुलगायत पनि यसअघि नै माधव पक्षमा घोषित रुपमै लागेका थिए ।
लेखराज भट्टको टोसलो रावललाई बाँकी नै
एमालेमा मिसिए पनि रावललाई पूर्वमाओवादी नेता लेखराज भट्ट पक्षको टोसलो बाँकी नै रहनेछ । १० बुँदेअनुसार २०७५ जेठ २ कै अवस्थामा एमालेलाई फर्काएपनि सुदुरपश्चिममा भने थप विभाजन हुने देखिन्छ ।
पछिल्लो समय भित्रिएका र एमालेको सुदुरपश्चिमको नेतृत्व गरेको भट्ट समूहले रावललाई सहयोग होइन् विरोध गर्दै आएका छन् । यसअघि सुदुरपश्चिमको इन्चार्ज को हुने भन्ने विषयमा रावल पक्षधर र भट्ट पक्षधरबीच पटक–पटक झडपसमेत भएका थिए ।
जसले पनि रावललाई थप अप्ठ्यारो पार्ने देखिन्छ ।
वि.सं.२०७८ भदौ ८ मंगलवार १३:२७ मा प्रकाशित
