हामी सबैकाे संसारन्यूज

भदौ ११, काठमाडौं । नेपाली कांग्रेसका उपसभापति विमलेन्द्र निधिले आगामी १४ औं महाधिवेशनमा सभापतिमा उठ्नेगरि तयारी थालेका छन् । सभापतिमा लड्ने घोषण गरेका उनले शुक्रबार नयाँ बानेश्वरमा सम्पर्क कार्यालय नै खोलेर चुनावी अभियानको शुरुवात गरेका छन् ।

शुक्रबार बिहान हिन्दु परम्पराअनुसार साइत नै निकालेर उनले कार्यालयको शुभारम्भ गरेका थिए । निधिको सचिवालयका अनुसार पशुपतिनाथ, जानकी, दक्षिणकाली, बगलामुखी, डोलेश्वरलगायत विभिन्न मन्दिरका पूजारी तथा पण्डितबाट पुरा गरि कार्यालयको उद्घाटन गरेका थिए ।

उनलाई विभिन्न ज्योतिष, पञ्चाङ्ग निर्णायक समिति, बौद्ध धर्मका लामा र मुस्लिम धर्मका मौलनाहरूले पनि विजयको आशिर्वाद दिएका थिए।

हिन्दु धर्मको पक्षमा अभियान चलाउने संकेत

यसअघि धर्म निरपेक्षताको पक्षमा उभिएका निधि हिन्दु धर्मको पक्षमा अभियान चलाउने गरि आएका छन् । कार्यालय खोल्दै गर्दा पशुपतिदेखि विभिन्न मन्दिरका पुजारी तथा पण्डितलाई ल्याएर पुजा आजा गर्नुले पनि त्यहि संकेत गरेको छ ।

कांग्रेसमा कोइराला परिवारले हिन्दु धर्मको पक्षमा अभियान चलाउने तयारी गरिरहेका बेला उनको सुरुवातीलाई निकै चाखपूर्वक हेरिएको छ । कांग्रेसका कतिपयले कोइराला परिवारको समर्थनसमेतमा उनले अभियान चलाउन खोजेको पनि बताएका छन् ।

यसअघि शंशाक कोइराला र प्रकाशमान सिंहबीच निधिको पटक–पटक ‘बे्रकफास्ट’ तथा ‘लञ्च’ छलफल भएका थिए ।