हामी सबैकाे संसारन्यूज

सम्मोहित छु म
तिम्रो बोलीको जादूमा ।

आफूभित्रको तिमीलाई
अन्वेषण गर्न
लागिपरेको छु म-
यतिबेला ।

मलाई थाहा छ –
जब मलाई देख्छौ
असाध्यै खुशाउँछौ तिमी,
बटुलेर
मनका ती खुशीहरूलाई
मुस्कानहरू बनाउँछौ,
थाक थाक लगाउँछौ
मुस्कानको
अनि
मुस्कानलाई मतिर
हुत्याइ पठाउँछौ ।

हो, त्यही अमूल्य क्षणलाई
पर्खेर
तपस्यारत छु अहिले ।
तिमी बोलेको सुन्न पाएको बेला
मनले रमाइलो उत्सव मनाउँछ,
भित्र अन्तर्मनमा कतै
मधुरो सङ्गीतजस्तो केही बजिरहन्छ
अनि लाग्छ –
तिमी बोलिरहुँ
म सुनिरहुँ सुनिरहुँ
अविराम रहोस् यो सिलसिला
अनन्त अनन्त पलोस् यो प्रक्रिया ।

मेरो मनको आकाशमा
तिम्रो सम्झनाको घाम लागिरहोस् । लागिरहोस्
अवरूद्ध नबनोस् कतै यो क्रम ।
साँझको रक्तिम आकाशमा
मैंले सधैँ हेर्ने तस्वीरमा
तिमी उसरी नै मुस्कुराइरहनू
जुन मुस्कान छ नि तिम्रो
त्यही मुस्कानले मेरो जिन्दगी उज्यालो छ ।
त्यही मुस्कानमा मेरो जिन्दगी देख्छु म
साँझसँगै तिमी सधैँ
यसरी नै आउनु है
मेरो सम्झनामा
मेरो सम्झनामा ।।