हामी सबैकाे संसारन्यूज

भदौ १३, काठमाडौं । नेकपा (एमाले) र जनता समाजवादी पार्टी (जसपा)बाट निर्वाचित जनप्रतिनिधिहरुले आगामी भदौ २२ गतेसम्म दल रोज्न पाउने भएका छन् । निर्वाचन आयोगले एमाले फुटेर बनेको नेकपा (एकीकृत समाजवादी) र जसपा फुटेर बनेको लोकतान्त्रिक समाजवादी पार्टी (लोसपा)मा जान २२ गतेसम्मको समय सीमा दिएको हो ।

अध्यादेशअनुसार प्रदेश र स्थानीय तहका जनप्रतिनिधिलाई २१ दिनसम्म दल रोज्न दिने व्यवस्था छ । आयोगको आइतबार बसेको बैठकले १५ गतेदेखि २२ गतेसम्म दल रोज्न दिने निर्णय गरेको हो ।

आयोगले जनाएअनुसार साबिकको दल छाड्ने प्रदेश सभा सदस्यहरुले प्रदेश निर्वाचन कार्यालय र स्थानीय जनप्रतिनिधिहरुले जिल्ला निर्वाचन कार्यालयमा गएर सनाखत गर्नुपर्नेछ ।

केन्द्रीय समिति वा सांसदहरुको २० प्रतिशत पुर्‍याएर दल विभाजन गर्न सक्ने अध्यादेश जारी भएसँगै एमाले र जसपाबाट फुटेर क्रमशः एकीकृत समाजवादी र लोकतान्त्रिक समाजवादी पार्टी गठन भएका थिए । आयोगले दुवै दललाई भदौ ९ मा सनाखत पछि मान्यता दिएको थियो ।