हामी सबैकाे संसारन्यूज

भदौ १४, काठमाडौं । सत्तारुढ गठबन्धनका दलहरु छिटोभन्दा छिटो मन्त्रिपरिषदलाई पूर्णंता दिन सहमत भएका छन् । सोमबार प्रधानमन्त्री निवास बालुवाटारमा बसेको दलहरुको बैठकमा यस्तो सहमति भएको हो । एकिकृत समाजवादीका नेता डा. विजय पौडेलका अनुसार आगामी बुधबारसम्म मन्त्रिपरिषदलाई पूर्णंता दिन सहमति जुटेकाे छ ।

त्यस्तै बैठकमा केपी शर्मा ओली नेतृत्वको सरकारले अध्यादेशमार्फत ल्याएको बजेट सच्याउने पनि निर्णय भएको छ । उनका अनुसार आवश्यक कानून बनाएर बजेट सच्याउन सत्ता साझेदार दलहरुले प्रधानमन्त्री शेरबहादुर देउवालाई सुझाएका छन् ।

दलहरुबीच यसअघि नै मन्त्रालय संख्याको बाँडफाँडका विषयमा मोटामोटि छलफल भएको थियो । बताइएअनुसार संख्याको विषयमा टुंगो लगाइएपनि कुन मन्त्रालय कसले पाउने भन्ने विषयमा सहमति भईसकेको थिएन । बताइएअनुसार आज वा भोलीभित्रै शीर्ष नेताहरुबीच बसेर उक्त विषयमा पनि निर्णय लिने बैठकमा सहमति भएको छ ।

सरकार गठनको झण्डै डेढ महिना बित्न लाग्दा पनि मन्त्रिपरिषदले पूर्णंता नपाएकोमा सरकारको आलोचना हुने गरेको छ । गठबन्धनका दलहरु यसअघि पनि पटक–पटक छलफलमा बसेपनि निष्कर्ष भने निस्कन सकेको थिएन ।

सम्बन्धित समाचार

बालुवाटारमा गठबन्धनको बैठक : मन्त्रिपरिषद विस्तारबारे टुंगो लगाउने तयारी