Sansar News
भदौ १४, काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले मधेशी जनताको मुक्तिका लागि मधेश माओवादी मय हुनुपर्ने बताएका छन् । उनले माओवादी अगाडि नआई मधेशी जनताको मुक्ति नहुने बताए ।
सोमबार पार्टी प्रवेश कार्यक्रमलाई काठमाडौंमा सम्बोधन गर्दै उनले मधेश अन्य पार्टीहरुले जनतालाई लुट्ने मात्रै काम गरेको आरोप लगाए ।
उनले भने,‘जबसम्म माओवादी केन्द्रले प्रदेश नम्बर २ मा अत्यधिक बहुमत ल्याउँदैन वा जबसम्म प्रदेश नम्बर २ माओवादीमय हुँदैन, तबसम्म मधेशी जनताले मुक्ति पाउँदैनन् । त्यसकारण पनि यो हामीले संकल्प लिनुपर्छ ।’
उनले माओवादी बाहेकाले सरकारको नेतृत्वको गर्दा के हुने रहेछ परीणाम सबैले भोगिसकेको बताए । ‘माओवादीबाहेक अरु कसैको नेतृत्वमा सरकार बन्दा परीणाम के हुन्छ भनेर हामी सबैले भोगिसकेका छौं, केपी ओलीलाई प्रधानमन्त्री बनायौं, तर परीणाम के भयो भने झण्डै झण्डै संघीयता खारेजी भयो, ७ दशक लामो संघर्षबाट प्राप्त उपलब्धि झण्डै गुम्यो’, उनले भने ।
उनले परिवर्तनका निम्ति लड्ने पछाडि परेको तर प्रतिगामी तत्वले रजाईँ गर्ने अवस्था भएको बताए ।
वि.सं.२०७८ भदौ १४ सोमवार १७:५० मा प्रकाशित
