Sansar News
१४ भदौ, पोखरा । गण्डकी प्रदेशमा कोरोनाबाट संक्रमित हुने र मृत्यु हुनेको संख्यामा कमी आएको छ ।
प्रदेशको स्वास्थ्य निर्देशनालयका अनुसार मृत्युहुनेमा प्रदेशमा सोमबार १७० जनामा संक्रमण र ३ जनाको मृत्यु भएको छ ।
सोमवार स्याङजाका २ र कास्कीका १ गरी तीनजनाको मृत्यु भएको हो । सोमबार थपिएका ३ जनासँगै प्रदेशमा हालसम्म ज्यान गुमाउनेको संख्या १,२९३ पुगेको छ ।
त्यस्तै प्रदेशमा सोमवार म्याग्दीमा ७, गोरखामा ३०, तनहुँमा ६, कास्कीमा ७३, स्याङजामा १५ र नवलपरासीपूर्वमा ३९ जना गरी १७० जना नयाँ संक्रमित थपिएका छन् । आइतवारको तुलनामा प्रदेशमा संक्रमित हुनेको संख्या झण्डै आधा घटेको हो ।
सोमवार थपिएका १७० जनासँगै प्रदेशमा हालसम्म ८१ हजार २७८ जनामा कोरोना संक्रमण पुष्टि भएको छ भने ती मध्ये ७६ हजार ७०३ जना निको भइसकेका छन् । सोमवार प्रदेशमा ३०३ जना संक्रमणबाट मुक्त भएका छन् ।
निर्देशनालयका अनुसार प्रदेशमा हाल ३,३८२ सक्रिय संक्रमित रहेका छन् । ती मध्ये २९११ जना होम आइसोलेशनमा र अन्यको विभिन्न अस्पताल तथा आइसोलेशन सेन्टरमा उपचार भइरहेको निर्देशनालयले जनाएको छ । प्रदेशमा पछिल्लो २४ घण्टामा ९४८ वटा नमुना परीक्षण गरिएको थियो ।
गण्डकी प्रदेशमा ६ कोरोना संक्रमितको मृत्यु, २३० जनामा संक्रमण
वि.सं.२०७८ भदौ १४ सोमवार १८:१० मा प्रकाशित
