हामी सबैकाे संसारन्यूज

काठमाडौं । नेकपा (एमाले)का अध्यक्ष केपी शर्मा ओलीले प्रधान्यायाधीश चोलेन्द्र शमशेर राणाले मात्रै नभई प्रधानमन्त्री शेरबहादुुर देउवाको पक्षमा परमादेश जारी गर्ने पाँचै जना न्यायाधीशले राजीनामा दिनुपर्ने बताएका छन् । मंगलबार एमालेको स्थानीय तहको अधिवेशनलाई उद्घाटन गर्दै ओलीले न्यायालयमा देखिएको विवादमा पाँचै न्यायाधीश उत्तिकै जिम्मेवार रहेको बताए ।

‘सर्वोच्च अदालतमा आफैं तमासा देखिएको छ, श्रीमान् न्यायाधीशहरु आफैं कसले के–के गर्नुभएको थियो, उधिन्न थाल्नुभएको छ’, ओलीले भनेका छन्, ‘परमादेश त एक जनाले होइन् पाँचै जनाले दिएको होला, पाँचै जनाले परमादेश दिनुभएको थियो भने एक जनासँग मात्रै राजीनामा किन माग्नुहुन्छ श्रीमान् ज्यूहरु ? पाँचै जनाले परमादेश दिएर देशलाई यो हालतमा पुर्याउनु भएको छ त पाँचै जनाले राजीनामा गरे उपयुक्त होइन् र ?’

ओलीले ‘पाँचै न्यायाधीशले परमादेशबाट सर्वोच्च अदालतको मानमर्दन गरेको होइन् र ?’ भनि प्रश्न पनि गरेका छन् ।

उनले अदालतमा देखिएको अराजकताको जिम्मा सबै न्यायाधीशहरुले लिनुपर्ने बताए । न्यायालयमाथिको विश्वास टुट्न दिन नहुने उनको भनाई छ ।

‘न्यायाधीशको रोजाई हुने, बारले इजलास गठन गर्ने, अधिवक्ताले इजलास गठन गर्ने जस्ता खालका अभ्यासहरु भए’, ओलीले भनेका छन्, ‘संविधानमा हुँदै नभएको राष्ट्रपतिको अधिकारमाथि धावा बोलेर, २४ घण्टाभित्र, यति बजेभित्र यस्तो ढंगले राष्ट्रपतिलाई परमादेश जारी गर्ने तपाईँहरु अहिले पोल खोलाखोल गर्दै हुनुहुन्छ, मलाई चिन्ता कुन पक्ष हार्यो, कुन पक्षले जित्यो भन्नेमा छैन्, लोकतन्त्रले जित्नुपर्दछ, हाम्रो न्यायप्रणाली स्वच्छ र पारदर्शी हुनुपर्दछ, हाम्रो न्यायीक निकायप्रति आशा, भरोसा र विश्वास हुनुपर्दछ, के आज विश्वासको अवस्था छ ?’

यसअघि मंगलबार मात्रै सञ्चारकर्मीसँग कुराकानी गर्दै ओलीले न्यायालयमा देखिएको गुटगत विवादको पछि नलाग्ने बताएका थिए । उनले कुनै न्यायाधीशको पक्षमा लागेर राजीनामा नमाग्ने बताएका थिए । उनले परमादेशको परिणाम देखिएकाे बताएका थिए ।

सम्बन्धित समाचार

प्रधानन्यायाधीशमाथि उठेको प्रश्नबारे पहिलोपटक बोले ओली, भन्छन् – परमादेशको परिणाम देखियो