हामी सबैकाे संसारन्यूज

नारायण अर्याल । चालु आर्थिक वर्षको पहिलो चार महिनामा साढे ६ खर्ब बराबरको सामाग्री आयात भएको छ ।

जसमा मोवाइल मात्रै २० अर्ब ३४ करोड ८६ लाख बराबरको भएको भन्सार विभागले जनाएको छ । चालु आवको सोही अवधिमा सबैभन्दा धेरै डिजेल मात्रै ३४ अर्ब ३३ करोड २१ लाख बराबरको भएको छ ।

यस्तै, भटमासको कच्चा तेल रु २७ अर्ब २२ करोड ७१ लाख, रु १९ अर्ब १७ करोड ५७ लाख बराबरको कच्चा पाम आयल, रु १८ अर्ब ६६ करोड ६५ लाख बराबरको पेट्रोल र रु १७ अर्ब ६६ करोड ४० लाख बराबरको आइरन, स्टिल आयात भएको छ ।

चालु आर्थिक वर्षको पहिलो चार महिनामा आयात र निर्यात दुबै बढेको छ । भञ्सार विभागले सार्वजनिक गरेको तथ्यांकअनुसार सो अवधिमा ८२ अर्ब १२ करोड १२ लाख बराबरको समाग्री निर्यात भएको छ । त्यस्तै ६ खर्ब ५० अर्ब २९ करोड ४३ लाख बढीको विदेशी सामाग्रीको आयात भएको छ । गत आर्थिक वर्षको सोहि अवधिमा भन्दा आयातमा ६१ द्यशमलब ५७ प्रतिशत र निर्यातमा १ सय ४ दशमलब २९ प्रतिशत वृद्धि भएको तथ्यांकले देखाएको छ ।

चालु आवको ४ महिनामा नेपालले १ सय ३८ वटा देशबाट सामाग्री आयात गरको छ । जसमा सबैभन्दा धेरै सामाग्री भारतबाट गरेको तथ्यांकले देखाएको छ । १ सय ३८ वटा देशबाट ६ खर्ब ५० अर्ब २९ करोड ४३ लाख बराबरको सामान आयात गर्दा भारतबाट मात्रै ३ खर्ब ८५ अर्ब ९५ करोड ७० लाख बढीको सामाग्री आयात भएको हो । चालु आवको सोही अवधिमा चीनबाट ९४ अर्ब ३० करोड १४ लाख बराबरको सामाग्री आयात भएको विभागले उल्लेख गरेको छ ।