हामी सबैकाे संसारन्यूज

काठमाडौं । नेकपा (एमाले)को १० औं महाधिवेशनको बन्द सत्र झण्डै ५ घण्टा ढिलो गरि सुरु भएको छ । मुख्यतः पदाधिकारी चयनको विषयमा भईरहेको प्रयास निष्कर्षमा पुग्न नसकेपछि बन्द सत्र ढिलाई भएको हो । १० बजेदेखि सुरु हुने भनिएको बन्द सत्र दिउँसो ३ बजेपछि मात्रै सुरु भएको थियो ।

अहिले बन्द सत्र जारी छ । बन्द सत्रमा नेताहरुले सम्बोधन गरिरहेका छन् । बन्द सत्रको सुरुवाती सत्रमा विदेशी पाहुना पनि सहभागी छन् ।

सहमति भएपछि बन्द सत्र : ओली

पार्टी अध्यक्ष केपी शर्मा ओलीले पार्टी नेतृत्वको विषयमा सहमति भइसकेको जिकिर गरेका छन् । बन्द सत्र हलमा प्रवेश गर्ने क्रममा उनले यस्तो बताएका हुन् ।

‘सहमति भएको हो ?’ भन्ने प्रश्नमा ओलीले ‘हो सबै मिलिसक्यो’ भन्ने जवाफ दिएका थिए ।

तर, छलफल नै पेचिलो बनेपछि बन्दसत्र

ओलीले सहमति भएको भनेपछि पदाधिकारी चयनको विषय निकै पेचिलोपूर्णं बन्दै गएको बुझिएको छ । शनिबार दिउँसोसम्म सहमति जुटाउन गरिएको प्रयास व्यर्थ देखिएको बताइएको छ ।

बताइएअनुसार ओली समूहभित्रै सहमतिको विषय बन्दै गएको छ । विशेषतः वरिष्ठ उपाध्यक्ष र महासचिव पदको विषयमा नेताहरुबीच निकै पेचिलोपूर्णं दाबेदारी देखिएको छ ।

वरिष्ठ उपाध्यक्षमा ईश्वर पोखरेल र सुवास नेम्वाङले नछाड्ने र महासचिवमा विष्णु पौडेल र शंकर पोखरेल पनि नछाड्ने अडानमा देखिएका छन् ।

यता ओली गुटभित्रै समस्या देखिएको १० बुँदे समूह र बादल समूह अलमलमा परेको छ ।