हामी सबैकाे संसारन्यूज

अफ्रिका । नेपाली महिला बेच्ने क्यानेडानली व्यापारी आसिफ अमीरालि अलिभाई जेथा ३० वर्ष कैदमा परेका छन् ।

केन्याको मोम्बासास्थित सान्जु उच्च अदालतका वरिष्ठ आवासीय अधिकारी डेभिड ओधियाम्बोले उनलाई ३० वर्ष लामो कैद सजाय सुनाएका हुन् ।

उनलाई विभिन्न ३ आरोपमा मुद्दा चालेकाले त्यसबाहेक उनलाई १ मिलियन स्थानीय मुद्राको जरिवाना समेत तोकिएको छ । नृत्यांगना र सेविकाको काम लगाइदिने भनेर केन्या पुर्याएका नेपाली महिलाहरुलाई बेचबिखन गरेको आरोपमा उनीमाथि मुद्दा चल्दै आएको थियो ।

१६ र १७ वर्षका २ युवती, २२ देखि २६ वर्षका ८ जना र ३० वर्ष माथिका दुई नेपाली युवतीमाथि अपराध गरेको आरोपमा सन् २०१९ मा मोम्बासा न्यालीको एमके प्लाजामा खानतलासी गरी मानव बेचविखन विरुद्धको संगठित अपराध भन्दै उनलाई पक्राउ गरिएको थियो ।

मोम्बासाको न्यालीस्थित एमके प्लाजामा रहेको जेठाको रंगीला ग्रिल एण्ड बार (सेकुवा तथा मधुशाला) मा इन्टरनेशनल अर्गनाइज्ड क्राइम व्युरोका गुप्तचरले सन् २०१९ मा छापा मारेर १२ नेपाली युवतीहरुलाई उद्धार गरेको थियो ।

विदेशी भूमिमा न्यायको आशा लाग्दो समाचार
हाल नाइजेरियामा रहेका गैरआवासीय नेपाली अभियन्ता हिक्मत थापाले यसलाई बिदेशी भूमीमा न्यायको आशलाग्दो समाचार भनेका छन् ।

‘अफ्रिकाका डान्सबारमा बेचिने नेपाली चेलीहरुका मानवतस्कर दलालहरुलाई नेपाल सरकारले अहिलेसम्म न्यायको कठघरामा उभ्याउन नसके पनि आज केन्याको एक अदालतले १२ जना नेपाली चेलीहरुलाई डान्सबारमा अबैध रुपमा पुर्याउने एक दलाललाई तीस बर्षको जेल सजाय तोकेको छ ।’ थापाले भनेका छन् ।