हामी सबैकाे संसारन्यूज

काठमाडौं । सर्वोच्च अदालतले राष्ट्रिय खेलकुद परिषदका सदस्य सचिव रमेश सिलवाललाई बर्खास्त गर्ने सरकारको निर्णय तत्काल कार्यान्वयन नगर्न अन्तरिम आदेश दिएको छ । बुधबार न्यायाधीश हरि फुयालको एकल इजलासले यस्तो आदेश दिएको हो ।

केपी शर्मा ओली नेतृत्वको पूर्ववर्ती सरकारको पालामा सिलवाल सदस्यसचिवमा नियुक्त भएका थिए। गत वर्ष साउन १२ गते दोस्रोपटक सदस्यसचिव नियुक्त भएका सिलवाललाई शेरबहादुर देउवा नेतृत्वको सरकारले असोज १ गते बर्खास्त गरेको थियो । त्यसविरुद्ध सिलवालले गत कात्तिक २८ गते सर्वोच्चमा रिट दायर गरेका थिए ।

उनको बर्खास्तीसँगै सरकारले माओवादी केन्द्र निकटका टंकलाल घिसिङलाई खुल्ला प्रतिस्पर्धाको माध्यमबाट गत मंसिर १३ मा नियुक्त गरेको थियो ।

सर्वोच्चले नयाँ नियुक्त सदस्यसचिव घिसिङलाई कामकाज नगर्न अन्तरिम आदेश जारी गरेको छ ।