हामी सबैकाे संसारन्यूज

काठमाडौं । नेपाली कांग्रेसको सभापति पदमा पराजित भएका डा। शेखर कोइरालाले आफूहरु भागबण्डा र गुटबन्दीको राजनीतिमा नलाग्ने बताएका छन् । बुधबार महाधिवेशन प्रतिनिधिलाई धन्यवाद दिन आयोजित कार्यक्रममा उनले महाधिवेशन प्रतिनिधिहरुले आफूलाई माया गरेर मत दिएको भन्दै उनले यही माया बोकेर नयाँ ढंगले अघि बढ्ने बताए ।

कोइरालाले पार्टीभित्रका बेथिति अन्त्य गर्न सभापति शेरबहादुर देउवा तयार नदेखिए सशक्त रूपमा प्रस्तुत हुने भने प्रतिबद्धता जनाएका छन् ।

‘लोकतान्त्रिक प्रतिस्पर्धाबाट विजयी भएकोमा शेरबहादुर देउवालाई बधाई छ । उहाँ विगतका वेथिति अन्त्य गर्न तयार नभए हामी सशक्त रूपमा प्रस्तुत हुन्छौँ’ उनले भने ।

उनले निर्वाचनमा पराजित भएको कुरालाई आफूले सामान्य रुपमा लिएको भन्दै निर्वाचनमा कोही जित्ने र कोही हार्ने कुरा स्वाभाविक हुने बताए ।

उनले भने, ‘मभित्र कुनै कुनै कुण्ठा छैन । तर यो पराजयमा राम्रो कुरा देखेँ, नेपाली काँग्रेसका ताईजस्ता साथी, लोकतन्त्रप्रेमी, काँग्रेसलाई माया गर्ने साथी, आम जनताले हाम्रो कदम, हाम्रो टीम विजयी भएको सोच्नु भएको छ ।’