हामी सबैकाे संसारन्यूज

सरकारी विद्यालयमा भर्ना गरेपनि लामा पढ्न भन्दै बीचमै कक्षा छाडेर विद्यार्थी गुम्बा गएपछि विद्यालय रित्तिने अवस्थामा पुगेपछि अभियान थालिएको हो ।

सरकारी विद्यालय बन्द भएको बिही गाविसमा विद्यार्थी गुम्बामा लामा पढ्न गएका छन् । बिहीमा पुनः विद्यालय पुनःस्थापना गरी गुम्बा पुगेका विद्यार्थी विद्यालय शिक्षामै फर्काउने अभियान कार्यालयले अघि बढाएको हो । खाजासहित आवासीय सुविधा पाएपछि गुम्बामा लामा पढ्न भन्दै जाने विद्यार्थीको लर्को नै छ ।

उत्तरी भेगका सात गाविसका छवटा विद्यालयमा आवासीय सुविधासहित विद्यार्थी पढ्दै आएका छन् । जिल्ला शिक्षा कार्यालयको तथ्याङ्क हेर्दा गएको वर्षसम्म तीन विद्यालयका २०० जना विद्यार्थीले आवासीय सुविधा लिएको देखिन्छ । एकसय ८० वटा कोटा थपेर यस वर्षदेखि छवटा विद्यालयमा आवासीय सुविधासहित विद्यार्थी पठनपाठन गर्दै आएको जिल्ला शिक्षा अधिकारी दीपेन्द्र सुवेदीले जानकारी दिनुभयो ।

ल्हो गाविसस्थित ल्हो प्राविका ५५ मध्ये २० जना विद्यार्थीले आवासीय सुविधामा पढिरहेका छन् । तिब्बतसँग सीमा जोडिएको सामागाउँ प्राविका ८० मध्ये ५० विद्यार्थीले आवासीय सुविधा पाएका छन् । प्रोकको नु्रवी प्राविका ३९ विद्यार्थीमध्ये ३० जनाले आवासीय सुविधासहित विद्यालयमै बसेर पढिरहेको शिक्षा कार्यालयले जनाएको छ ।

आवासीय सुविधासहित पढ्दै आएका विद्यार्थीलाई सरकारले प्रतिविद्यार्थी मासिक रु चार हजार दिने गरेको छ । छेकम्पारको बुद्ध माविका २५ जना, मान्वुको भवानी माविमा ७० र उत्तरी सात गाविसको एक मात्र मावि सिर्दिवासको बुद्ध आवासीयमा १५० जनाले आवासीय सुविधासाथ पढिरहेका छन् ।

जिशिअ सुवेदीका अनुसार विद्यालयबाट टाढाका विद्यार्थीलाई आवासीय सुविधा दिनका लागि प्राथमिकता दिइएको छ जसले गर्दा विद्यालयमा विद्यार्थीको सङ्ख्या धेरै छ । बिहीका स्थानीय नवीन गुरुङका अनुसार सरकारी विद्यालयमा आवासीय सुविधा पाएपछि गुम्वाबाट फर्काएर अभिभावकले छोराछोरीलाई विद्यालय शिक्षामा ल्याएका छन् ।

विद्यालय शिक्षाबाट वञ्चित दुर्गमवासीले सरकारी सेवा, जागिर खान नपाएको, नेपाली भाषा बोल्न तथा नबुझ्दा अनेक खालका समस्या झेल्नुपरेको गुरुङले बताउनुभयो ।

दुर्गम भेगका विद्यालयमा शिक्षक नियमित नबस्ने, हिउँदमा चिसो र हिउँ पर्दा पनि पठनपाठन अवरुद्ध हुने गर्छ । एक गाविसमा कम्तीमा एक विद्यालयमा आवासीय सुविधा पु¥याउन सकेमा सरकारी विद्यालयमा विद्यार्थीको सङ्ख्या ह्वात्तै बढ्ने दुर्गम भेगका अभिभावक बताउँछन् ।