Sansar News
काठमाडौं । जनता समाजवादी पार्टीका अध्यक्ष उपेन्द्र यादवले माओवादी जनयुद्ध र मधेश विद्रोहबाटै देशमा राजनीतिक परिवर्तन सम्भव भएको बताएका छन् । माओवादी केन्द्रको महाधिवेशन उद्घाटन सत्रलाई सम्बोधन गर्दै यादवले तत्कालिन समयमा युद्ध लडेको पनि सम्झिए ।
‘जनयुद्धका विभिन्न मोर्चामा सँगै लडेको सम्झना अहिले पनि भइरहेको छ’, यादवले भने, ‘माओवादी जनयुद्ध र मधेश विद्रोह नभएको भए मुलुक संघीय लोकतान्त्रिक गणतन्त्र हुने थिएन । देश राजतन्त्रकै वरिपरि घुमिरहेको हुन्थ्यो ।’
उनले सत्य निरुपण तथा मेलमिलापको विषय अहिले पनि अलपत्र रहेको भन्दै जनयुद्ध र विद्रोहमा लागेकाहरूलाई न्याय दिलाउन प्रचण्डलाई ध्यानाकर्षण गराए ।
‘सत्य निरुपण तथा मेलमिलाप आयोग अलपत्र छ। जनयुद्ध ताका बेपत्ता पारिएका परिवारले न्याय अहिलेसम्म पनि पाएका छैनन्। उनीहरुले न्याय पाऊन्,’ उनले भने।
वि.सं.२०७८ पुस ११ आइतवार १७:३३ मा प्रकाशित
