Sansar News
सधैँ घर–घर डुली जो हात जोड्दै निहुरिएको छ ।
उही नेतृत्वमा पुग्दा ठुलो धोका दिएको छ ।
कतै नाङ्गा भुतुङ्गा छन् कतै छन् मखमली पहिरन,
चुनावी भेल समताको नदीमा उर्लिएको छ ।
हिजो छलछाम गर्दै धन कमाएको थियो जसले,
उसैको मान इज्जत आज धनमा पोखिएको छ ।
थियो जो खानदानी ऊ छ हरदम नम्र बानीको,
ठगी गर्दै कमाएको छ जो ऊ टुप्पिएको छ ।
अनौठा पात्र छान्थे जो कथामा पटकथा लेख्दै,
उनैको हातमा साङ्लो अचानक जकडिएको छ ।
बहर: हजज मुसम्मन सालिम
अर्कान : १२२२–१२२२–१२२२–१२२२
किशोर कोइराला, इनरुवा, सुनसरी
वि.सं.२०७८ माघ २९ शनिवार ०८:३४ मा प्रकाशित
