Sansar News
काठमाडौं । अमेरिकी सहयोग परियोजना एमसीसी विरोधी आन्दोलनमा उत्रिएको नेकपा (माओवादी केन्द्र) को सहायक संगठन वाईसीएल नेपालका संयोजक सुमन देवकोटासहित आधा दर्जन कार्यकर्ता घाईते भएका छन् ।
बुधवार बिहानैदेखि संसद भवन अगाडि विरोध प्रदर्शन गरिरहेका प्रदर्शनकारीमाथि प्रहरीको हस्तक्षेपका क्रममा वाईसीएल नेपालका संयोजक देवकोटासहित अखिल (क्रान्तिकारी) लगायत जनवर्गीय संगठनहरुका आधा दर्जन कार्यकर्ता घाईते भएको माओवादी केन्द्रका केन्द्रीय सदस्य रामप्रसाद सापकोटा ‘दिपशीखा’ ले जानकारी दिएका छन् ।
यसैबीच नेकपा (एकिकृत समाजवादी) पार्टी निकट विद्यार्थी संगठन अनेरास्वीयुका अध्यक्ष सुदेश पराजुलीसहित झण्डै चारदर्जन पक्राउ परेका छन् ।
बुधवार बिहानैदेखि संसद भवन अगाडि विरोध प्रदर्शन गरिरहेका उनीहरुमाथि प्रहरीले हस्तक्षेप गरी अनेरास्वीयुका नेता तथा कार्यकर्तालाई पक्राउ गरेको हो ।
अनेरास्वीयुका उपमहासचिव नरेश न्यौपानेका अनुसार संगठनका उपाध्यक्ष उपाध्यक्ष हिरेन्द्र शाही, उपमहासचिव भुपेन्द्र शाह, कल्याण दाहाल, मेघनाथ चापागाईं, महेश श्रेष्ठ, अशोक थापा, मिलन राई र सचिव मनिषा कार्की लगायत ४२ जना पक्राउ परेका छन् ।
वि.सं.२०७८ फागुन ४ बुधवार १६:२८ मा प्रकाशित
