Sansar News
काठमाडौं । बहुचर्चित अमेरिकी परियोजना एमसीसी परियोजना शुक्रवारको प्रतिनिधिसभाको बैठकमा पनि टेवुल हुने संभावना टरेको छ ।
बालुवाटारमा बिहीवार साझ बसेको सत्तारुढ गठबन्धनको बैठकमा एमसीसीका विषयमा सहमति जुटाउन नसकेपछि शुक्रवारको प्रतिनिधिसभाको बैठकमा एमसीसी टेवुल हुने संभावना टरेको छ । यद्यपी प्रधानमन्त्रीले फागुन १६ गतेसम्ममा एमसीसीलाई निष्कर्षमा पुर्याएरै छाड्ने बताएका छन् ।
एमसीसीलाई प्रतिनिधिसभामा टेवुल गराएरै छाड्ने नेपाली कांग्रेसको अडानमा माओवादी केन्द्र र एकिकृत समाजवादीले साथ नदिएपछि अन्ततः प्रधानमन्त्री देउवा एमसीसी अगाडि बढाउने कि गठबन्धन तोड्ने भन्ने अन्यौलमा परेका छन् । यसका लागि प्रधानमन्त्री देउवाले एमालेसँग समेत संवाद अगाडि बढाएका छन् ।
प्रधानमन्त्री देउवाले बिहीबार बिहान कांग्रेस नेता मिनेन्द्र रिजाल र ज्ञानेन्द्र बहादुर कार्कीमार्फत् संवाद अगाडि बढाएका थिए । तर, एमाले अध्यक्ष ओलीले सत्तारुढ गठबन्धनको निर्णयपछि मात्र आफुले यसबारेमा बोल्ने बताएका थिए ।
सत्तारुढ गठबन्धनको बैठक विना निष्कर्ष टुंगियो
एमसीसीका विषयमा सहमति जुटाउन बिहीबार साँझ बालुवाटारमा बसेको सत्तारुढ गठबन्धनको बैठकमा विना निष्कर्ष टुंगिएको छ ।
प्रधानमन्त्री निवासका बसेको पाँचदलीय गठबन्धनको बैठकमा एमसीसीका विषयमा सहमति जुटाउने प्रयास गरिए पनि सहमति जुट्न नसकेपछि भोली बिहान ९ बजे पुनः बैठक बस्ने गरी टुंगिएको हो ।
बैठकमा माओवादी केन्द्रका अध्यक्ष प्रचण्ड र एकिकृत समाजवादीका अध्यक्ष माधव कुमार नेपालले एमसीसी टेबुल गर्नका लागि पहिलो संसद अवरोध हटाउनुपर्ने बताएका थिए । उनीहरुले एमसीसी टेवुल गर्नका लागि एमालेसँग संवाद गरेर संसद अवरोध हटाउनका लागि पहल गर्न समेत प्रधानमन्त्री समक्ष आग्रह गरेका थिए ।
‘कांग्रेसले फागुन १६ सम्ममा एमसीसीलाई निष्कर्षमा पुर्याउने’
बैठक लगत्तै सुचना तथा संचारमन्त्री मन्त्री ज्ञानेन्द्र बहादुर कार्कीले नेपाली कांग्रेसले फागुन १६ गतेसम्म निष्कर्षमा पुर्याएरै छाड्ने बताएका छन् । बैठक लगत्तै पत्रकारहरुसँग कुरा गर्दै सरकारका प्रवक्ता समेत रहेका मन्त्री कार्कीले पुर्ववर्ती सरकारले एमसीसीलाई टेवुल गरेको बताउँदै सरकार अविछिन्न यसको उत्तराधिकारी रहेको बताए ।
‘अब फेब्रअरी २८ (फागुन १६ गते) सम्ममा यसलाई हामीले निष्कर्षमा पुर्याउने हुनाले यसलाई टेवुल गर्नका लागि प्रधानमन्त्रीले प्रस्ताव गर्नु भएको छ । यहि प्रस्तावको परिवरी बसेर धेरै छलफल भएको छ,’ मन्त्री कार्कीले भने, ‘एमसीसीलाई १६ गतेभित्रमा निष्कर्षमा पुर्याउने गरेर छलफल केन्द्रीत छ ।’
संसद अवरोध हटाउन पहल गर्न माओवादी केन्द्रको आग्रह
बैठकमा नेकपा माओवादी केन्द्रले बैठकमा एमसीसीका विषयमा छलफल हुँदा पहिले संसद सुचारु गर्नुपर्ने माग गरेको छ ।
बैठक लगत्तै संचारमाध्यमसँग कुरागर्दै नेता श्रेष्ठले प्रधानमन्त्रीले एमसीसी टेवुल गरेर छलफल र निर्णय प्रक्रियामा जाने बताएको र यसलाई फागुन १६ गतेभित्रमा निष्कर्षमा पुर्याउने अडान राखेको बताएका छन् ।
‘बैठकमा सबै पार्टीले आ–आफ्नो दृष्टिकोण राखेका छन् । हामीले टेवुल गर्ने कुरा पहिलो त संविधान र कानुनको प्रावधानसँग मेल खान्छ कि खान्न भन्ने बहस पनि छ । त्यो हो आर्थिक सहायता, अहिलेसम्म यौटा पनि संसदबाट अनुमोदन गर्ने दिशामा लगिएको छैन । त्यसको परिणाम के हुन्छ भन्ने विषयमा पनि सहमति बनेको छैन, ’नेता श्रेष्ठले भने, ‘अर्को कुरा संसद अवरुद्ध भइरहेका बेला अहिलेसम्म अध्यादेश बाहेक कुनैपनि बिधेयक प्रस्ताव प्रस्तुत गरिएको छैन । यसलाई कसरी हेर्ने भन्ने कुरा राख्यौं ।’
नेता श्रेष्ठले व्यापक दीर्घकालिन असर पार्ने राष्ट्रिययतासँग जोडिएको संवेदनशील मुद्दा नेपाली समाजमा व्यापक छलफल र बहस भइरहेको र विभाजित समेत भइरहेको अवस्थामा त्यस्तो मुद्दालाई छलफल र बहस नगरी कसरी सदनमा लैजान मिल्छ भन्ने बैठकमा छलफल गरिएको बताए ।
एमाले अध्यक्ष भेट्न बालकोट पुगे प्रधानमन्त्री
सत्तारुढ गठबन्धन दलको बैठक विना निष्कर्ष टुंगिएपछि प्रधानमन्त्री देउवा एमालेका अध्यक्ष केपी शर्मालाई भेट्न बालकोट पुगेका छन् ।
एमसीसी संसदमा टेबुल गर्ने विषयमा सत्तारुढ गठबन्धन दलभित्रै सहमति जुटाउने आजको प्रयास पनि असफल भएपछि प्रधामन्त्री देउवा एमाले अध्यक्ष ओलीलाई भेट्न बालकोट पुगेका हुन् ।
एमसीसी परियोजना शुक्रवारको प्रतिनिधिसभाको बैठकमा टेवुल गर्ने अडान राख्दै आएका प्रधानमन्त्री देउवा अन्ततः गठबन्धनभित्रकै सहयात्रीबाट सहयोग नपाएपछि एमालेसँगको सहकार्यका लागि संवाद अगाडि बढाउन थालेका छन् ।
माओवादी केन्द्रले एमसीसीमा रहेका केही बुँदाहरु आपत्तिजनक रहेको बताउँदै यथास्थितिमा एमसीसी टेवुल गरिए सरकारबाटै बाहिरीने निर्णय गरेको छ भने एकिकृत समाजवादीका अध्यक्ष माधव कुमार नेपालले पनि बिहीवार पत्रकारहरुसँग कुराकानी गर्दै एमसीसीका विरुद्धमा मतदान गर्ने बताएका छन् ।
सत्ता गठबन्धनको बैठक विना निष्कर्ष टुंगियो, शुक्रवार पुन: बस्ने
वि.सं.२०७८ फागुन ५ बिहीवार २१:३८ मा प्रकाशित
