हामी सबैकाे संसारन्यूज

अभाव दीप ज्योतिको छ चेत अन्धकारमा ।
जुटेर बाल प्रेमको दियो नयाँ सुवासना ।।
उदार भाव नेत्र यो चिनेर देख्छ के गरी ?
विशाल दर्द कष्ट छन् हटून् सबै सधैँ भरी ।।०१।।

गमेर मात्र चेतमा नसाँच कर्म सर्वदा ।
भनी खुलोस् सुभावना अप्राप्ति प्राप्ति होस् सदा ।।
रमून् दुवै स्वहात यी सुकर्म प्रेम मार्गमा ।
रसाल कर्म मूलले झुमोस् धरा सुधारमा ।।०२।।

छ योग्य कर्मप्रीतको प्रगाढ छाप चेतमा ।
सकिन्न लक्ष्य चुम्न रे कुचाल दुष्ट द्वेषमा ।।
उठूँ म पुग्न विन्दुमा लिएर लक्ष्य चिन्तन ।
उँभो उडूँ म व्योममा भगाउँदै अकिन्चन ।।०३।।

जहाँ छ भोक रोगको प्रचण्ड घोर ताडना ।
छ चेतमा विलम्बता समात कर्म साधना ।।
म जुट्नुपर्छ रे उठी श्रमी बनेर धारमा ।
सचेत हुन् सबै सधैँ म फ्याँक्छु है किनारमा ।।०४।।

छन्द: पञ्चचामर
गण: ज र ज र ज गु
सङ्केत: isi     sis    isi    sis       isi     s

दीनानाथ पोख्रेल, इलाम