हामी सबैकाे संसारन्यूज

काठमाडौं । व्याख्यात्मक घोषणासहित एमसीसी अनुमोदन गर्ने निर्णयले सत्तारुढ माओवादी केन्द्रभित्र ठूलो मतभेद देखापरेको छ । एमसीसी अनुमोदन गर्ने पार्टी अध्यक्ष पुष्पकमल दाहाल ‘प्रचण्ड’को निर्णयमा शीर्ष तहकै नेताहरु विरोधमा उभिएका छन् । नेताहरुले सिंगो पार्टीको निर्णयविपरित प्रचण्डले निर्णय गरेको आरोप लगाएका छन् ।

व्याख्यात्मक घोषणासहित एमसीसी पारित गर्ने सत्ता गठबन्धनका शीर्ष नेताहरुको निर्णय लगत्तै माओवादीका वरिष्ठ नेता नारायणकाजी श्रेष्ठले “पार्टी अध्यक्ष नै पार्टीविरुद्व उभिएको” भन्दै विरोध जनाए । उनले एमसीसी अनुमोदन गर्ने निर्णयमा माओवादीभित्र ठूलो अहमति रहेको बताए ।

यता माओवादी केन्द्रको प्रमुख सचेतकसमेत रहेका नेता देव गुरुङले एमसीसी अनुमोदका निर्णय “ठूलो गद्दारी” भएको बताए । उनले यो निर्णयले मुलुक गम्भीर दुर्घटनातर्फ जाने बताए ।

“यसले राष्ट्रिय आत्मसमपर्णवाद र गद्दारीको दिशातिर जान्छ, यसले देशलाई दुर्घटनाबाट बचाउने होइन, झन् दुर्घटनारतिर लैजान्छ”, उनले सञ्चारकर्मीसँग भनेका छन् ।

नेता लिलामणी पोखरेलले पनि व्याख्यात्मक घोषणासहित पारित गर्ने निर्णय गलत भएको बताए । उनले उक्त निर्णयमा आफुँसहित थुप्रै नेताको गम्भीर असहमति रहेको बताए ।

एमसीसी अनुमोदनका निर्णयप्रति माओवादीभित्र नेता श्रेष्ठसहित देव गुरुङ, लिलामणि पोखरेल, कृष्णबहादुर महरा, गिरिराजमणि पोखरेल, लेखनाथ न्यौपानेलगायतका नेता विरोधमा उभिएका छन् । नेताहरुले गम्भीर अहसमति राखेको कारण आगामी समय माओवादीभित्र कस्तो परिस्थिति निर्माण हुन्छ भन्ने यकिन नभएको कतिपयले बताएका छन् ।

माओवादी केन्द्र जस्तै सत्ता साझेदार दल नेकपा (एकीकृत समाजवादी)भित्र पनि एमसीसीको निर्णयले गम्भीर संकट निम्त्याएको छ । झलनाथ खनालसहितका नेताहरुले उक्त निर्णयप्रति गम्भीर असहमति जनाएका छन् ।

सम्बन्धित समाचार

एमसीसी पारित गर्ने निर्णयमा नारायणकाजीको आपत्ति