हामी सबैकाे संसारन्यूज

काठमाडौं । सत्तारुढ नेकपा (एकीकृत समाजवादी)का नेता एवं पूर्वप्रधानमन्त्री झलनाथ खनालले एमसीसीलाई व्याख्यात्मक टिप्पणीसहित पारित गर्ने सत्तागठबन्धनको निर्णयप्रति आपत्ति जनाएका छन् । उनले एमसीसीसँग सम्बन्धित सबै दस्तावेज संसदमा नल्याई छलफल गर्न नमिल्ने बताए ।

“एमसीसीका दस्तावेजहरु सदनमा नल्याइकन कसरी हुन्छ ? एमसीसीसँग सम्बन्धित सबै दस्तावेज संसदमा वितरण गरियोस्, एमसीसीसँग भएको पत्राचार सदनले हेर्न पाउनुपर्छ, कसरी सम्झौता भयो जानकारी हुनुपर्छ”, उनले भने, “तपाईं हामी भेडा बाख्रा हैनौं ।”

उनले एमसीसीको विरोधमा सडकमा प्रदर्शन गरिरहेका नागरिकमाथि भइरहेको दमनको निन्दा गरे।

उनले नेपाल असंलग्न देशको रुपमा रहेको तर एमसीसी सम्झौतामा एक पटक होइन पटकपटक अमेरिका सुरक्षा अवधारणा मान्नु पर्ने उल्लेख भएको बताए । नेपाललाई कसैको सुरक्षा छाता ओड्ने कुरा स्वीकार्य नभएको उनको भनाइ थियो ।

उनले व्याख्यात्मक घोषणाको अर्थमाथि प्रश्न उठाए । उनले भने, “घोषणा सम्झौताको अंग बन्छ कि बन्दैन ? अमेरिका सम्झौता सुधार र संशोधन गर्न चाहान्छ भन्ने कुरा सदनले थाहा पाउनु पर्छ ।”