हामी सबैकाे संसारन्यूज

काठमाडौं । राष्ट्रिय जनमोर्चाकी नेतृ दुर्गा पौडेलले अमेरिकी सहयोग परियोजना एमसीसी मुख्यत चाइनाविरुद्ध घेराबन्दी गर्ने उद्धेश्यले नेपालमा आएको बताएकी छन् ।

आइतवार संसदमा एमसीसीकाबारेमा आफ्ना मत राख्दै नेतृ पौडेलले एमसीसी इण्डोप्यासिफिक रणनीति आइपीएसको अंग भएको बताएको उदाहरण दिँदै आइपीएसको मुख्य उद्धेश्य चाइनाविरुद्धको घेराबन्दी गर्नु रहेको बताइन् ।

‘चाइनाविरुद्ध घेरबन्दी गर्नका लागि आइपसीयसले नेपाललाई प्रयोग गर्न चाहान्छ । त्यसैले हामीले शैनिक उद्धेश्यका लागि कुनै पनि देशले नेपाललाई उपयोग हुन दिनु नेपालको असंलग्न परारष्ट्र नीतिको विरुद्ध छ,’ नेतृ पौडेलले भनिन्, ‘त्यसप्रकारको कुनैपनि सम्झौताको हामी दृढताको विरोध गर्दछौं ।’

सत्तारुढ गठबन्धन दलकी एक सहयात्री समेत रहेकी नेतृ पौडेलले एमसीसी नेपालको राष्ट्रियता, सार्वभौमिकता, असंलग्न परराष्ट्र नीति राष्ट्रिय स्वाभिमान र बृहद राष्ट्रियहितका विरुद्ध रहेको बताइन् ।

‘त्यसकारण यसलाई अस्वीकार गरेर जानुपर्छ भन्ने हाम्रो स्पष्ट र दृढ मत पनि त्यहि छ,’ नेता पौडेलले भनिन्‘ कुनै विदेशी अनुदान वा ऋणलाई स्वीकार गर्नुहुन्छ कि हुँदैन भन्ने प्रश्न मुख्य होइन,तर त्योसित जुन प्रकारको राष्ट्रियता, सार्वभौमिकता र राष्ट्रिय हितमा आँच आउने शर्तहरु जोडिएका छन् त्यो अवस्थामा त्यसलाई स्वीकार हुन्छ कि हुँदैन भन्ने मुख्य प्रश्न त्यो हो ।’

नेता पौडेलले एमसीसी आर्थिक र विकास परियोजना भनिए पनि अमेरिकाका उपविदेश मन्त्रीले २०१९ मे मा नेपाल भ्रमणका बेलामा र अमेरिकाका सहायक विदेश राज्यमन्त्री, भियतनाम भ्रमणका बेला र अमेरिकी दूतावासका एक कर्मचारीले पनि एमसीसी इण्डोप्यासिफिक रणनीति आइपीएसको अंग भएको बताएको स्मरण गरिन् ।

उनले एमसीसीलाई संसदबाट पारित गराउनु राष्ट्रघाती कदम हुने भएकाले यसलाई खारज गर्ने समेत आग्रह गरिन् ।