हामी सबैकाे संसारन्यूज

झापा । स्थानीय तहको निर्वाचन नजिकएसँगै झापा जिल्लामा जिल्ला निर्वाचन कार्यालयले आइतबार मतदाता नामावली अद्यावधिकका लागि राजनीतिक दलका प्रतिनिधि, सुरक्षा निकायका प्रमुख र पत्रकारसँग अन्तर्क्रिया गरेको छ ।

जिल्ला प्रशासन कार्यालयमा आयोजित कार्यक्रममा मतदाता नामावलीमा शुद्धता ल्याउने, स्थानीय निर्वाचनलाई मितव्यायी र प्रभावकारीसहित मत बदर न्यून गर्न सकारोवारवालाले निर्वाह गर्नुपर्ने भूमिकाबारे छलफल भएको थियो । जिल्लामा जम्मा मतदाताको सङ्ख्या छ लाख ५० हजार २५८ रहेको निर्वाचन कार्यालयका प्रमुख तुलसीकुमार नेपालले जानकारी दिए । उनले सबैभन्दा बढी मतदाता मेचीनगर नगरपालिकामा रहेको बताए । सबैभन्दा बढी मेचीनगरमा ९० हजार ८२६ र सबैभन्दा कम (२३ हजार ७४५)गौरीगञ्ज पालिकामा रहेको प्रमुख नेपालले जानकारी दिए ।

विसं २०७४ को निर्वाचनमा पाँच लाख ८५ हजार २१६ मतदाता रहेकामा हाल ६५ हजार ४२ थपिएर कूल मतदाता छ लाखभन्दा बढी भएका छन् । जिल्लामा २८६ वटा मतदानस्थल र ७६० वटा मतदान केन्द्र राखिने भएको छ ।

प्रमुख जिल्ला अधिकारी छवि रिजालको अध्यक्षतामा भएको कार्यक्रममा नेपाली कांग्रेसका सभापति देउमान थेबे, (नेकपा एमाले)का जिल्ला अध्यक्ष दीपक कार्कीलगायत सबै राजनीतिक दलका प्रमुखको उपस्थिति थियो ।