हामी सबैकाे संसारन्यूज

काठमाडौं । सत्तारूढ नेपाली कांग्रेसका सांसद डा. मीनेन्द्र रिजालले एमसीसीमा व्याख्यात्मक घोषणा गर्नुको कुनै अर्थ नरहेको बताएका छन् । आइतबार प्रतिनिधिसभाको बैठकमा सम्झौतामाथि सैद्धान्तिक छलफलका क्रममा बोल्दै उनले जुनसुकै व्याख्यात्मक टिप्पणी लेखिए पनि सम्झौताको बुँदा परिवर्तन नहुने स्पष्ट पारे ।

रिजालले माओवादी केन्द्र र एकीकृत समाजवादी तर्फ लक्षित गर्दै व्याख्यात्मक घोषणा “जुँगा मिलाउन” आवश्यक परेको उल्लेख गरे । एमसीसीमा कांग्रेसले आवश्यकभन्दा बढी लचकता देखाएको उनको भनाई छ ।

“कसैको मुज (जुँगा) निचा (मुनि) गर्न मिलेन भनेर त्यो व्याख्यात्मक टिप्पणी आवश्यक पर्योि, जति नारा लगाए पनि यो प्रावधान परिवर्तन हुँदैन, लचकता कांग्रेसले प्रशस्त देखाएको छ”, रिजालले भने, “धेरै जितेँ नभन्नुहोस् । सडकमा मान्छे उचाल्नुभयो । निर्वाचनअघि राष्ट्रघाती, पछि राष्ट्रवादी भन्दै हिड्नुभयो ।”

उनले चीन, अमेरिका, भारत सबैबाट सहयोग लिनुपर्ने बताए। आफुँ सत्तामा हुँदा अघि बढाइएको होइन भनि सबै नेताहरुलाई उनले प्रश्न गरे । “नारा लगाएर मात्र लोकतन्त्र बलियो हुन्न । हिजो एकसाथ सत्तामा बस्दा यो अघि बढाएको हैन ?”, रिजालको प्रश्न छ ।

एमसीसी परियोजना ५३ देशमा लागु भइसकेको, १० देशमा कार्यान्वयनको अवस्थामा रहेको र १२ देशमा विकसित हुँदै गएको तथा दुई देशमा बन्द गरिएको भन्दै उनले नेपालमा मात्र यो लागु भएको जस्तो गरेर गलत बहस भइरहेको उल्लेख गरे ।