हामी सबैकाे संसारन्यूज

काठमाडौं । रुसी विदेशमन्त्री सर्गेई लाभरोभले तेस्रो विश्वयुद्ध हुनसक्ने चेतावनी दिएका छन् । अमेरिकासहित नेटो समर्थक देशहरुले यूक्रेनलाई आणविक हतियार दिन खोजेको चर्चाका बीच उनले यस्तो चेतावनी दिएका हुन् ।

विदेशमन्त्री लाभरोभले युक्रेनलाई आणविक हतियार प्राप्त गर्न नदिने बताए । आणविक हतियारको प्रयोग हुने अवस्था आएमा त्यो तेस्रो विश्वयुद्ध हुने र त्यो निकै नै विनाशकारी हुने उनको भनाई छ ।

युक्रेनसँगको वार्ताको विषयमा बोल्दै लाभरोभले रुस युक्रेनसँगको दोस्रो चरणको वार्ताका लागि तयार रहेको तर, युक्रेनले अमेरिकाको इशारा पछ्याइरहेको आरोप लगाए । लाभरोभले क्षेत्रिय शान्तीका लागि यूक्रेनमाथि आक्रमण गर्नुको विकल्प नभएको दाबी गरेका छन् ।

एक दिन अघि, लाभरोभले युक्रेनले आणविक हतियार प्राप्त गर्न कोशिस गरिरहेको बताएका थिए। “यो ठूलो खतरा हो र यसलाई रोक्न आवश्यक छ”, उनले भने, “युक्रेनसँग अझै सोभियत आणविक प्रविधि छ, त्यसैले रूसले जवाफ दिनुपर्छ।”

पूर्व सोभियत संघका देशहरूमा पश्चिमी देशहरूले सैन्य अड्डाहरू निर्माण गर्न नपाउने उनको भनाई छ ।

हालै रुसी राष्ट्रपति भ्लादिमिर पुटिनले आफ्ना आणविक सेनालाई विशेष सतर्कता अपनाउन आदेश दिएका छन् । अमेरिकालगायत धेरै देशले यसको आलोचना गरेका छन् ।

सम्बन्धित समाचार

बंकरबाटै युक्रेनी राष्ट्रपतिको अन्तर्वार्ताः बाइडेनले अब ठूलो निर्णय लिनुपर्छ