हामी सबैकाे संसारन्यूज

काठमाडौं। राष्ट्रिय प्रजातन्त्र पार्टी (राप्रपा) का पूर्वअध्यक्ष डा. प्रकाशचन्द्र लोहनीले ठूला दलका छलछामबाट वाक्क जनताले राप्रपाबाट विकल्प खोजेको, गुणात्मक परिवर्तन चाहेको बताएका छन् । बिहीबार राप्रपा केन्द्रीय समितिको बैठकलाई सम्बोधन गर्दै डा.लोहनीले राप्रपा वैकल्पिक शक्तिको रूपमा आओस् भन्ने जनताले चाहेको बताए ।

“राप्रपा वैकल्पिक शक्तिको रूपमा आओस् भन्ने जनचाहना छ, यो अतिरञ्जना होइन, जनता माझबाट आएको यथार्थ हो”, लोहनीले भनेका छन्, “राप्रपाले महाधिवेशनपछि धेरै ठूलो फड्को मारेको छ ।”

कांग्रेस, एमाले र माओवादीको छलछाम र कामबाट वाक्क भएर राप्रपालाई जनताले आशाका साथ हेरीरहेको उनको भनाई छ । “राष्ट्रवादी, प्रजातान्त्रिक छवी भएको राप्रपाबाट सुधार प्राप्त होस् भन्ने जनताले अपेक्षा लिएका छन्”, लोहनीले भने, “यो लहर, लहरले दिएको शक्ति सदा उपलब्ध नहुन सक्छ । त्यसकारण समयले दिएको शक्तिलाई साथ लिएर यसभन्दा माथि उठ्ने प्रयास गर्नु पर्दछ । यो अवस्था आन्तरिक सुक्षबुझ, एकता र आन्तरिक व्यवस्थापनबाट प्राप्त हुन्छ ।”

लोहनीले कार्यकर्तालाई स्थानीय तहको निर्वाचनमा पूर्ण तयारीका साथ लाग्न निर्देशन दिए । उनका अनुसार स्थानीय चुनाव राप्रपाको अनुकुलन बन्दै गएको छ । “वातावरण हाम्रो पक्षमा छ, साथीहरु सक्रियपूर्वक लाग्नुपर्छ”, बैठकलाई सम्बोधन गर्दै उनले भने ।

समसामयिक राजनीतिक विषयमा छलफल गर्न राप्रपाको बुधबारदेखि केन्द्रीय समिति बैठक बसेको थियो । बिहीबार सम्पन्न बैठकमा नेताहरुले समसामयिक राजनीतिक विषयका साथै स्थानीय निकायको निर्वाचनको विषयमा आ–आफ्नो धारणा राखेका थिए ।