हामी सबैकाे संसारन्यूज

काठमाडौं । नेपालबाट तीन महिनामा २४ करोडको पानी विभिन्न देशमा पुगेको छ ।

भन्सार विभागका अनुसार तीन महिनामा नेपालका विभिन्न कम्पनीले उत्पादन गरेको पानी अष्ट्रेलिया, युएई, कतार, चीन, भारत, पोल्याण्ड, जापान र बेलायतमा पुगेको छ ।

नेपालका विभिन्न कम्पनीद्धारा प्रशोधित गरिएको पानी निर्यात गर्नेमा बोटलर्स नेपालले भारतमा सबैभन्दा बढी पानी निर्यात गरेको सोमबारको कान्तिपुर दैनिकमा समाचार छ ।

गतवर्ष ६ करोड, ३ लाख, ८१ हजार रुपैयाँको १० लाख ९१ हजार ४२८ लिटर पानी चीन, कतार र भारतमा निर्यात भएको थियो भने चालु आर्थिक वर्षको ३ महिनामा मात्र २४ करोड ३५ लाख ४५ हजार बराबरको पानी निर्यात भएको हो । मंसिर, पुष र माघमा मात्रै ४४ लाख ४७ हजार ५३३ लिटर पानी निर्यात भएको तथ्यांक छ ।

चालु आर्थिक वर्षमा अन्य देशको तुलनामा सबैभन्दा बढी भारतमा पानी निर्यात भएको भन्सार विभागका प्रवक्ता पुण्यविक्रम खड्काले बताएका छन् ।

विभागका अनुसार किन्ले, एक्वाफिना, म पानी, रसुवा पानी लगायतका ब्रान्डका पानी विदेशमा निर्यात गरिएको हो । निर्यातलाई नै लक्षित गरी उद्योगहरुले अत्याधुनिक प्रशोधन प्लान्ट समेत राखेका छन् ।