Sansar News
काठमाडौं । नेकपा माओवादी केन्द्रको केन्द्रीय कमिटीको बैठक बस्दैछ ।
बत्तिस पुतलीको अनुपम फुडल्याण्डमा आज ११ बजेदेखि बस्ने उक्त बैठकमा केन्द्रीय कमिटीको पूर्णता, पोलिटव्युरो, स्थायी कमिटी गठन लगायतका विषयमा छलफल हुने पार्टी कार्यालयका सचिव श्रीराम ढकालले जानकारी दिएका छन् ।
शुक्रवारदेखि सुरु भएको माओवादी केन्द्रको केन्द्रीय बैठक शनिवार शिर्ष नेताहरुको छलफलका लागि भन्दै स्थगित गरिएको थियो भने आइतबार आन्तरिक तयारी नपुगेको भन्दै स्थगित गरिएको थियो ।
बैठकको पहिलो दिन एमसीसी लगायतका विषयमा छलफल चलेको थियो भने आजको बैठकमा कार्ययोजना निर्माण र संगठन लगायतका विषयमा छलफल हुने बताइएको छ । साथै नजिक रहेको स्थानीय तहको निर्वाचनका विषयमा पनि छलफल गरिने बताइएको छ ।
गत पुष ११ देखि १८ गतेसम्म चलेको माओवादी केन्द्रको आठौं राष्ट्रिय महाधिबेशनले २४७ केन्द्रीय कमिटी चयन गर्दै सम्पन्न भएको थियो । सोहि केन्द्रीय समितिको शुक्रवारदेखि सुरु भएको बैठकले पार्टीको वरिष्ठ उपाध्यक्ष, ६ उपाध्यक्ष, एक महासचिव, दुई उपमहासचिव, तीन सचिव र एक कोषाध्यक्ष चयन गर्ने बताइएको छ । साथै विधान अनुसार ६३ जना केन्द्रीय सदस्यहरु समेत मनोनित हुने छन् ।
वि.सं.२०७८ फागुन २३ सोमवार ०९:३३ मा प्रकाशित
