हामी सबैकाे संसारन्यूज

काठमाडौं । प्रधानमन्त्री शेरबहादुर देउवाले आगामी चुनावमा गठबन्धन नै गरेर जानुपर्ने बताएका छन् । नेपाली कांग्रेस पर्साका नवनिर्वाचित पदाधिकारीहरुलाई बधाई ज्ञापन गर्दै उनले गठबन्धन नगरी जाँदा कसैले पनि बहुमत ल्याउन नसक्ने बताए ।

“यही अवस्थामा कुनै पनि पार्टीले बहुमत ल्याएर सरकार बनाउन सक्दैन, सरकारका लागि गठबन्धन आवश्यक हुन्छ, हिजो एक्लै चुनाव लड्दा हाम्रो अवस्था के थियो ? तपाईंहरूलाई थाहै छ”, प्रधानमन्त्री देउवाले भने, “अहिले गठबन्धनका सरकार हुँदा मिलेर चुनाव लडियो भने स्थानीय तह, प्रदेश र केन्द्रमा पनि हाम्रो गठबन्धनको सरकार रहिरहन सक्छ ।”

उनले वर्तमान सरकार दलहरुबीचकोे सहकार्यको उपलब्धी भएको बताए । देउवाले आफुँ प्रधानमन्त्री भएसँगै देशमा धेरै परिवर्तन पनि भएको बताए । उनले लेख्ने बोल्ने स्वतन्त्रता जनताले निर्धक रुपमा पाएको उल्लेख गरे ।

“म प्रधानमन्त्री हुँदाको अवस्था र अहिलेको अवस्थामा धेरै फरक छ, वास्तवमा मैले त प्रधानमन्त्री हुन नै चाहेकै थिइनँ, मलाई गठबन्धनका सबै साथीहरूले सहयोग गरेर प्रधानमन्त्री भएको हुँ”, देउवाले भने, “अहिले परिस्थिति बद्लिएको छ, डरत्रास हटेको छ, लेख्ने बोल्ने स्वतन्त्रता प्राप्त भएको छ ।”

स्मरणरहोस्, कांग्रेसभित्र चुनावी गठबन्धन गर्न नहुने मत बढी देखिएको छ । हालै बसेको कांग्रेस पदाधिकारी बैठकमा पार्टी महामन्त्री गगन थापाले एक्लै लड्दा कांग्रेसले बहुमत ल्याउने बताएका थिए ।