हामी सबैकाे संसारन्यूज

काठमाडौं । सरकारले बैदेशिक रोजगार विभागबाट श्रम स्वीकृति लिएर जाने नेपाली कामदारहरुले अब एयरपोर्टमा क्युआर कोडसहितको ई–स्टीकर मात्र देखाए पुग्ने भएको छ ।

विभागले एक सूचना जारी गर्दै बैदेशिक रोजगारमा जाने कामदारले श्रम स्वीकृति निस्साको रुपमा प्राप्त गर्ने क्युआर कोडसहितको ई–स्टीकर सम्बन्धीत कामदारको इमेल ठेगाना तथा कामदारको Feims Account  मा उपलब्ध हुने र श्रम स्वीकृतिको जानकारी कामदारको मोबाइलमा म्यासेज गरेर पठाइने हुनाले उक्त क्युआर कोड सहितको ई–स्टीकर अनिवार्य मोबाइलमा डाउनलोड गरेर मोवाइल मार्फत पेश गर्न भनिएको छ । साथै एकप्रति ई–स्टीकर प्रिन्ट गरेर साथमा राख्न समेत भनिएको छ ।

विभागले त्रिभुवन विमानस्थलस्थित बैदेशिक रोजगार विभागको श्रम डेस्कबाट यसअघि प्रिन्ट गरिएको स्टीकरमा छाप लगाइदै आएकोमा यहि फागुन २५ गतेदेखि त्यो व्यवस्था हटाइएको समेत जानकारी दिएको छ ।

त्यसैगरी विमानस्थलमा राखिएको श्रम डेस्कका कारण बैदेशिक रोजगारीमा जाने नेपालीहरुले दोस्रो दर्जाको नागरिक सरहको व्यवहार भएको भन्दै विरोध गर्दै आएकोमा श्रम मन्त्रालयले बुधबारबाट श्रम डेस्क समेत हटाएको छ ।

यसअघि बैदेशिक रोजगारमा जाने र भिजिट भिसा र श्रम भिसामा जाने नेपालीहरुको प्रस्तान द्धारा छुट्टाछुट्टै भएकोमा बुधबारबाटै सबै यात्रुका लागि एउटै ढोकाको व्यवस्था गरिएको छ ।